मुंबई: जागतिक बँकेने चालू आर्थिक वर्ष 2022-23 साठी भारताचा सकल देशांतर्गत उत्पादन (जीडीपी) विकास दर अंदाज 6.5 टक्क्यांवरून 6.9 टक्के केला आहे. जागतिक बँकेने नुकताच आपला ताजा अहवाल प्रकाशित केला आहे. या अहवालानुसार अमेरिका, युरोझोन आणि चीनमधील घडामोडींचा परिणाम भारतावरही दिसून येत आहे. चालू आर्थिक वर्षात सरकार 6.4 टक्क्यांचे वित्तीय तुटीचे लक्ष्य गाठेल असा विश्वास जागतिक बँकेने व्यक्त केला आहे. चालू आर्थिक वर्षात महागाई 7.1 टक्के राहील असा जागतिक बँकेचा अंदाज आहे.

बिघडलेल्या बाह्य वातावरणात 2022-23 या आर्थिक वर्षात जीडीपी वाढीचा दर 6.9 टक्के असू शकतो, असे अहवालात म्हटले आहे. हा अंदाज बरोबर असला तरी आर्थिक वर्ष 2022 मधील 8.7 टक्क्यांच्या तुलनेत जीडीपी वाढीचा दर मोठ्या प्रमाणात घसरेल. याआधी स्वित्झर्लंडची ब्रोकरेज कंपनी UBS India ने देखील आर्थिक वर्ष 2022-23 मध्ये भारताचा जीडीपी वाढीचा दर 6.9 टक्के असण्याचा अंदाज वर्तवला होता.