बीड-जिल्ह्यात कोरोनाबाधितांचा आकडा दिवसेंदिवस वाढतच आहेत. सगळीकडेच कोरोनचा प्रसार होत असताना बीडच्या जिल्हा कारागृहातही कोरोनाने शिरकाव केला आहे. पंधरा दिवसामध्ये येथील 28 कैद्यांना कोरोनाची लागण झाल्याचे समोर आले आहे. सध्या सात कोरोना बाधितांवर उपचार सुरु आहेत.
बीड जिल्हा कारागृहामध्ये १६१ कैद्यांची क्षमता आहे. पण या कारागृहात प्रत्यक्षात २९७  कैदी आहेत. क्षमतेपेक्षा जवळपास दुप्पट कैदी याठिकाणी असल्यामुळे कारागृहात कैद्यांना जागा अपुरी पडत आहे. त्यामुळे कैद्यांमध्ये कोरोनाचा प्रादूर्भाव पसरल्याची भीती व्यक्त करण्यात येत आहे. पंधरवाड्यात 28 कैद्यांना कोरोनाची लागण झालेली आहे. यातील २१ जणांना डिस्चार्ज मिळाला असून सध्या 7 जणांवर उपचार सुरु असल्याची माहिती कारागृह अधीक्षक महादेव पवार यांनी दिली.