शाळकरी विद्यार्थ्यांना घेऊन शैक्षणिक सहलीला निघालेल्या बसला सोलापूर जिल्ह्यातील अकलूज परिसरात भीषण अपघात झाला. भरधाव वेगात असलेल्या एसटी बसने रस्त्याच्या कडेला उभ्या असलेल्या आयशर ट्रकला जोरदार धडक दिली. या भीषण अपघातात एका शिक्षकाचा जागीच मृत्यू झाला. तर एक शिक्षक गंभीर जखमी झाला आहे.
अपघातात ५ ते ६ लहान विद्यार्थी देखील जखमी झाल्याची माहिती आहे. अपघाताची ही दुर्देवी घटना गुरुवारी (२१ डिसेंबर) पहाटेच्या सुमारास घडली आहे. अपघातानंतर स्थानिकांसह पोलिसांनी घटनास्थळी धाव घेत बचावकार्य केले.
जखमी विद्यार्थ्यांना तातडीने उपचारासाठी अकलूज येथील रुग्णालयात दाखल करण्यात आलं आहे. मिळालेल्या माहितीनुसार, अपघातग्रस्त बस पुणे जिल्ह्यातील इंदापूर तालुक्यातील बावडा येथील श्री शिवाजी शैक्षणिक विद्यालयातील विद्यार्थ्यांना घेऊन कोकण दर्शनासाठी गेली होती.
सहलीवरून परतत असताना सोलापूर जिल्ह्यातील अकलूज नजीक अवघड वळणावर आयशर टेम्पो उभा होता. बांबूची वाहतूक करणाऱ्या या टेम्पोचे टायर पंचर असल्याने चालकाने तो रस्त्याच्या कडेला उभा केला होता.
याचवेळी अवघड वळण घेत असताना चालकाचे बसवरील नियंत्रण सुटले. काही क्षणात बस आयशर टेम्पोवर आदळली. या भीषण अपघातात एका शिक्षकाचा जागीच मृत्यू झाला. तर एका शिक्षकासह ५ ते ६ विद्यार्थी देखील जखमी झाले.
