बीड-मावळत्या वर्षाला निरोप व नववर्षाचे अध्यात्मिक विचारांनी स्वागत करण्यासाठी गत १६ वर्षांपासून बीडमध्ये झुंबरलाल खटोड सामाजिक प्रतिष्ठानकडून आयोजित केला जाणारा यंदाचा १७ वा राज्यस्तरीय कीर्तन महोत्सव शहरातील यशवंतराव चव्हाण नाट्यगृहात साध्या पध्दतीने  होणार असल्याची माहिती प्रतिष्ठानचे अध्यक्ष गौतम खटोड व पदाधिकार्‍यांनी दिली.
या महोत्सवाचे उद्घाटन २८ डिसेंबर रोजी होणार आहे.१० जानेवारी २०२१ पर्यंत चालणार्‍या या महोत्सवात दररोज दोन सांप्रदायिक कीर्तन सेवा व दुपारच्या सत्रात प्रवचनसेवा होणार आहे. राज्यस्तरीय कीर्तन महोत्सवानिमित्त झुंबरलाल खटोड सामाजिक प्रतिष्ठानच्या सौजन्याने आनंदऋषिजी नेत्रालय व्हिजन सेंटर (राजर्षी शाहु बँकेशेजारी,जालना रोड,बीड) येथे दि.१ ते १० जानेवारी या कालावधीत मोफत नेत्रतपासणी व अल्पदरामध्ये नेत्र शस्त्रक्रिया शिबीर आयोजित करण्यात आले आहे.तसेच आनंदऋषिजी ब्लड बँक अहमदनगर यांच्या वतीने ११ जानेवारी रोजी सकाळी १० ते दुपारी ४ या वेळेत रक्तदान शिबीराचे आयोजन करण्यात आले आहे. यात रक्तदात्यांनी सहभागी व्हावे असे आवाहन करण्यात आले.