चेन्नई : वर्ल्ड कपच्या पहिल्याच सामन्यात भारतीय संघाने विजयाचा पाया रचला असून आता ते विजयापासून फक्त काही पावलांच्या अंतरावर आहेत. भारताच्या फिरकीपटूंनी यावेळी ऑस्ट्रेलियाच्या फलंदाजांना चांगलेच नाचवले. त्यामुळे भारताला ऑस्ट्रेलियाला पहिल्याचच सामन्यात ऑल आऊट करता आले. भारताच्या रवींद्र जडेजाने तर यावेळी ऑस्ट्रेलियाच्या फलंदाजांना चांगलेच धारेवर धरले आणि फक्त २८ धावांत तीन बळी मिळवले. जडेजाला यावेळी कुलदीप यादव आणि आर. अश्विन यांनी चांगली साथ दिली. त्यामुळे भारताला ऑस्ट्रेलियाच्या धावसंख्येवर लगाम लावता आला आणि त्यांना १९९ धावांत रोखले.
ऑस्ट्रेलियाने टॉस जिंकला आणि त्यांनी प्रथम फलंदाजीचा निर्णय घेतला. त्यानंतर जसप्रीत बुमराने यावेळी ऑस्ट्रेलियाला मिचेल मार्शच्या रुपात पहिला धक्का दिला. विराट कोहलीने त्याची भन्नाट कॅच पडकली आणि भेपळा न फोडता तो बाद झाला. त्यानंतर काही काळ डेव्हिड वॉर्नर आणि स्टीव्हन स्मिथ यांची चांगली भागीदारी झाली. पण कुलदीप यादवने आपल्याच गोलंदाजीवर वॉर्नरला झेलबाद केले. वॉर्नरने यावेळी सहा चौकारांच्या जोरावर ४१ धावा केल्या. वॉर्नर बाद झाला तरी स्मिथ हा दमदार फलंदाजी करत होता. पण जडेजाने त्याला क्लीन बोल्ड केले आणि भारताच्या मार्गातील मोठा अडसर दूर केला. स्मिथने यावेळी ५ चौकारांच्या जोरावर ४६ धावा केल्या. स्मिथ बाद झाला आणि त्यानंतर ऑस्ट्रेलियाचा डाव गडगडला. कारण त्यानंतर ऑस्ट्रेलियाच्या एकाही फलंदाजाला मोठी धावसंख्या उभारता आली नाही. भारताने त्यावेळी गोलंदाजीची पकड मजबूत केली आणि त्यामुळे त्यांना ऑस्ट्रेलियाच्या धावसंख्येला खीळ बसवता आली.
भारताकडून यावेळी जडेजा सर्वात यशस्वी गोलंदाज ठरला. जडेजाने तीन विकेट्स मिळवल्या. जडेजाने यावेळी स्मिथसह मार्नस लाबुशेन आणि अॅलेक्स कॅरी यांना बाद केले. फिरकीपटू कुलदीप यादव आणि वेगवान गोलंदाज जसप्रीत बुमरा यांनी प्रत्येरी दोन फलंदजांना बाद करण्याची किमया साधली. आर. अश्विन आणि हार्दिक पंड्या यांनी प्रत्येकी एक बळी मिळवला. भारताकडून फक्त मोहम्मद सिराजला ऑस्ट्रेलियाची शेवटची विकेट मिळवण्यात यश आले. पण एकंदरीत भारताच्या गोलंदाजांनी त्यांचे काम चोख बजावल्याचे पाहायला मिळाले.
