समृद्धी महामार्गावरील अपघातांची मालिका सुरुच आहे. भरधाव वेगात असलेला मालवाहू ट्रक पुलाच्या सुरक्षा कठड्याला धडकल्याने भीषण अपघात झाला आहे. या अपघातात वाहनचालकाचा जागीच मृत्यू झाला.समृद्धी महामार्गावरील आमगांव-खडकी शिवारात ही घटना घडली. हमीद आफताब सय्यद (वय २३ वर्ष) असं मृत वाहनचालकाचं नाव आहे.
बीड येथील आरेश ट्रान्सपोर्ट कंपनीचा मालवाहू ट्रक शिमला मिरची घेऊन जबलपूरला जाण्यासाठी निघाला होता. समृद्धी महामार्गावर वर्धा ते नागपूर दरम्यान पहिल्या लेनमधून जात असताना सदर ट्रकच्या वाहनचालकास अचानक पहाटेच्या वेळी झोपेची डुलकी लागली. त्यामुळे ट्रक अनियंत्रित होत रस्ता दुभाजकाच्या पुलाच्या सुरक्षा भिंतीवर धडकला.
अपघातात ट्रकच्या समोरील भागाचा चक्काचूर झाला आहे. यात वाहनचालकाचा जागीच मृत्यू झाला. अपघातानंतर वाहनचालकाचा मृतदेह ट्रकच्या कॅबिनमध्येच अडकल्याने तो काढण्यासाठी समृद्धी महामार्गावरील फायर अँड रेस्क्यू टीमच्या पथकाला पाचारण करण्यात आले होते.
