बीड - चौसाळा, नांदूरघाट येथे रात्री चोरट्यांनी धुमाकूळ घालत दुकानातील नगदी रकमेसह एका किराणा दुकानामधील तेलाचे डबे चोरून नेल्याची घटना घडली. या प्रकरणी अज्ञात चोरटयांविरोधात गुन्हा दाखल करण्यात आला.
चौसाळा येथील मोंढा रोडवर असलेल्या चंद्रकांत किराणा दुकानामध्ये रात्री अज्ञात चोरट्यांनी चोरी केली. यात तेलाचे २ डबे चोरून नेले. त्याचबरोबर ५ हजार रुपयांची रक्कम लंपास करण्यात आली. दुसरी चोरीची घटना श्रीनाथ कलेक्शन या ठिकाणी घडली. येथील ५ हजार रुपये चोरून नेले. जाधव यांच्या सराफा दुकानातील काही चांदी चोरून नेली. लहाने यांच्या मेडिकलमध्येही चोरी झाली. चौसाळ्यानंतर नांदूरघाट येथेही चोरीची घटना रात्री घडली. तांबोळी ट्रेडर्स येथील १० ते १५ हजार रुपयांचे साहित्य चोरून नेण्यात आले. शुभम ट्रेडर्स येथील एक पानबुडी मोटार, विनायक कृषी सेवा केंद्र येथील काही साहित्य व रोख रक्कम, संकल्प मेडिकलही फोडली. या ठिकाणी मात्र चोरटा सीसीटीव्हीमध्ये कैद झाला आहे. या चोरीच्या घटनांप्रकरणी संबंधित पोलीस ठाण्यात अज्ञात चोरट्यांविरोधात गुन्हे दाखल करण्यात आले आहेत.