नेकनूर-बीड तालुक्यातील मौजे.अंजनवती येथील येडे वस्तीवरील श्री संत तुकाविप्र संस्थान मंदिरात बुधवारी (दि.२६) पहाटे अडीच वाजेच्या सुमारास चोरट्यांनी जबरी चोरी करत दोन महिलांना बेदम मारहाण केली आहे.यामध्ये त्या दोन्ही महिलांना गंभीर मार लागला असून त्यांच्यावर बीडच्या खाजगी रुग्णालयात उपचार सुरु आहेत. घटनास्थळी नेकनूर पोलिसांनी भेट दिली असून याप्रकरणाचा पुढील तपास सुरु आहे.
बुधवारी पहाटे चोरटयांनी अंजनवती येथील संत तुकाविप्र संस्थानला लक्ष्य केले.यावेळी गाढ झोपेत असलेल्या पुजारी कृष्णा जोशी यांच्या रूमला बाहेरून कडी लावत शेजारच्या रूममध्ये झोपलेल्या कृष्णा जोशी यांच्या पत्नी गीता जोशी (वय-४५ ) व उषा प्रल्हाद लेले यांना चोरट्यांकडून गंभीर मारहाण करण्यात आली.यावेळी त्यांच्याकडील दीड तोळे सोने व नगदी रक्कम घेऊन चोरटे पसार झाले.या मारहाणीत दोन्ही महिला गंभीर जखमी झाल्या असून त्यांच्यावर बीडमधील खाजगी रुग्णालयात उपचार करण्यात येत आहे.घटनास्थळी नेकनुर ठाण्याचे सहाय्यक निरीक्षक शेख मुस्तफा , पोलिस उपनिरीक्षक विलास जाधव , हवालदार राख तसेच लिंबागणेश पोलिस चौकीचे नागरगोजे , हवालदार सचिन डिडुळ यांनी भेट दिली.
