मुंबई- २०२३ चा ब्लॉकबस्टर ठरलेल्या 'वेड' चित्रपटाने खरंच प्रेक्षकांना वेड लावलं. दाक्षिणात्य चित्रपट 'माजिली' चा रिमेक असणारा 'वेड' प्रेक्षकांच्या पसंतीस उतरला. या चित्रपटाला प्रेक्षकांनी भरभरून प्रेम दिलं. चित्रपटात लोकप्रिय मराठमोळा अभिनेता रितेश देशमुख आणि अभिनेत्री जिनिलिया देशमुख यांच्या मुख्य भूमिका आहेत. हा चित्रपट पाहण्यासाठी प्रेक्षकांनी तिकीटबारीवर तुफान गर्दी केली. अगदी छोट्या मुलांपासून सगळ्यांनाच या चित्रपटाने वेड लावलं. फक्त कथाच नाही तर या चित्रपटातील गाण्यांनीही प्रेक्षकांची मनं जिंकली. चित्रपटाने बॉक्स ऑफिसवर तुफान कमाई केली. सगळ्यांच्याच अपेक्षेवर खरा ठरत चित्रपट तब्बल १०० दिवस चित्रपटगृहात ठाण मांडून बसला. आता प्रत्येकाला चित्रपटाची एकूण कमाई जाणून घेण्याची उत्सुकता आहे. चला जाणून घेऊया चित्रपटाने एकूण किती कमाई केली.
'वेड' १०० दिवस थिएटरमध्ये होता त्यामुळे चित्रपटाची कमाई तितकीच जास्त असेल असे अंदाज लावले जात आहेत. चित्रपट येताच प्रेक्षकांमध्ये त्याची इतकी क्रेझ होती की हा चित्रपट 'सैराट'ने केलेला कमाईचा रेकॉर्ड मॉडेल असंही म्हटलं जात होतं. 'सैराट'ने बॉक्स ऑफिसवर तब्बल १३० कोटींचा गल्ला जमवला होता. मात्र या चित्रपटाला तो टप्पा गाठता आलेला नाही. प्रदर्शनाच्या काही दिवसातच या चित्रपटाने २० कोटींचा गल्ला जमवला होता. त्यानंतर ५० दिवसात चित्रपटाने तब्बल ७४ कोटींचा गल्ला जमवला. मात्र त्यानंतर चित्रपटांचे शो कमी करण्यात आले. रितेशने श्रावणी आणि सत्याच्या लग्नाचे काही क्षण चित्रपटात नव्याने टाकले होते. मात्र त्याचाही फार उपयोग झालेला दिसला नाही. अखेर १०० व्या दिवशी रितेशने चित्रपटाची आजवरची एकूण कमाई सांगितली आहे. या चित्रपटाने प्रदर्शनाच्या १०० दिवसात तब्बल ७५ कोटींची कमाई केली आहे.एका मराठी चित्रपटासाठी हा पल्ला गाठणं ही फार मोठी गोष्ट आहे. हा चित्रपट पॅन इंडिया प्रदर्शित केला गेला नसला तरी प्रत्येक भाषेतील चाहत्यांनी हा चित्रपट आवर्जून पाहिला. मराठी प्रेक्षकांनी तर चित्रपट डोक्यावर घेतला. त्यामुळेच तो ७५ कोटींचा टप्पा गाठू शकला.
