इंदूरमधील बेलेश्वर महादेव झुलेलाल मंदिराच्या विहिरीतून मध्यरात्री 12 ते 1.30 च्या दरम्यान आणखी 16 मृतदेह बाहेर काढण्यात आले. त्यानंतर या अपघातातील मृतांची संख्या 35 झाली आहे. सध्या बचावकार्य सुरू आहे. लष्कराने मोर्चाची कमान हाती घेतली आहे. गुरुवारी रामनवमीला येथे हवन-पूजनाचे आयोजन करण्यात आले होते, ज्यामध्ये अनेक भाविक सहभागी होण्यासाठी पोहोचले होते. यादरम्यान, मंदिरातील भूमिगत विहिरीचे छत कोसळले. त्यामुळे 40 हून अधिक लोक विहिरीत पडले. ही विहीर सुमारे 40 फूट खोल असून, त्यात भरपूर पाणीही होते. पोलिसांनी स्थानिक लोकांच्या मदतीने दोरीच्या साहाय्याने लोकांना विहिरीतून बाहेर काढले.
विहिरीमध्ये पाणी जास्त असल्याने बचावकार्यात अडचण निर्माण झाली. त्यानंतर पंपाच्या साहाय्याने पाणी बाहेर काढण्यात आले. पाणी ओसरल्यावर पुन्हा बचावकार्य सुरू करण्यात आले. एसडीआरएफचे डीआयजी महेशचंद्र जैन यांनी सांगितले की, विहिरीत खूप पाणी असल्यामुळे काहीही दिसत नव्हते. पाण्याचा उपसा केल्यानंतर त्यात आणखी मृतदेह दिसले. त्यांनी सांगितले की, SDRF, NDRF, आर्मी टीम, पोलिस आणि प्रशासन बचावकार्यात गुंतले आहेत. सुरुवातीला सुमारे 20 जणांना विहिरीतून सुखरूप बाहेर काढण्यात आले. यातील जखमींना रुग्णालयात पाठवण्यात आले.
ही दुर्दैवी घटना बेलेश्वर महादेव झुलेलेलाल मंदिर, स्नेह नगर येथे घडली. प्रत्यक्षदर्शींनी दिलेल्या माहितीनुसार, विहिरीचे छत वजनामुळे खचले आणि लोक त्यात पडले. हे मंदिर सुमारे 60 वर्षे जुने आहे. या घटनेची दंडाधिकारी चौकशी करण्याचे जिल्हाधिकाऱ्यांनी सांगितले आहे.
डोळ्यासमोर मृतदेह तरंगत होते
मंदिराचे पुजारी लक्ष्मीनारायण शर्मा यांनी सांगितले की, ही घटना दुपारी बाराच्या सुमारास घडली. रामनवमीच्या दिवशी श्रीरामाच्या आरतीची तयारी सुरू होती. दरम्यान, अचानक सर्वजण खाली पडले. मला पोहोता येत असल्याने मी वर आलो. 5-7 लोकांचे मृतदेह तरंगत होते. शिवरात्रीला एवढी गर्दी होती मात्र काही झाले नाही. हवन नेहमी बाहेर होते, पण यावेळी नवीन मंदिर बांधले जात असल्याने हवन आतच झाले. मी 2007 पासून मंदिरात पूजा करत आहे. सध्या पुजारी एका खासगी रुग्णालयात दाखल असून त्यांच्यावर उपचार सुरू आहेत.
केंद्र व राज्य सरकारने भरपाई जाहीर केली
मुख्यमंत्री शिवराज सिंह चौहान यांनी मृतांच्या नातेवाईकांना प्रत्येकी 5 लाख रुपये आणि जखमींना प्रत्येकी 50 हजार रुपयांची भरपाई जाहीर केली आहे. जखमींवर सरकार उपचार करणार आहे. मृतांच्या नातेवाईकांना प्रत्येकी 2 लाख रुपये आणि जखमींना प्रत्येकी 50 हजार रुपये पंतप्रधान राष्ट्रीय मदत निधीतून देण्याची घोषणा करण्यात आली आहे. पंतप्रधान कार्यालयाकडून ट्विट करून ही माहिती देण्यात आली आहे.
मृतांमध्ये आतापर्यंत या लोकांची ओळख पटली आहे
- लक्ष्मी (70) पति रतीलाल पटेल, पटेल नगर
- इंद्र कुमार (53) पिता थामावदास हरवानी, साधु वासवानी नगर
- भारती कुकरेजा (58) पति परमानंद कुकरेजा, साधु वासवानी नगर
- जयवंती (84) पति परमानंद खूबचंदानी, स्नेह नगर
- दक्षा पटेल (60) पति लक्ष्मीकांत पटेल, पटेल नगर
- मधु (48) पति राजेश भम्मानी, सर्वोदय नगर
- मनीषा मोटवानी पति आकाश मोटवानी, साधु वासवानी नगर
- गंगा पटेल (58) पति गगन दास, पटेल नगर
- कनक पटेल (32), पटेल नगर
- पुष्पा पटेल (49), पटेल नगर
- भूमिका खानचंदानी (31), पटेल नगर
राष्ट्रपतींपासून ते पंतप्रधान मोदी आणि राहुल गांधींनी शोक व्यक्त केला
राष्ट्रपती द्रौपदी मुर्मू यांनी इंदूर दुर्घटनेवर शोक व्यक्त केला आहे. त्यांनी मृतांच्या कुटुंबीयांच्या संवेदना व्यक्त केल्या. पंतप्रधान नरेंद्र मोदी यांनी ट्विट करून इंदूरमधील घटनेने खूप दुखावले असल्याचे म्हटले. मुख्यमंत्री शिवराज सिंह चौहान यांच्याशी चर्चा करून परिस्थिती जाणून घेतली. राज्य सरकार बचाव आणि मदत कार्यात वेगाने पुढे जात आहे.
