साताऱ्यातील पाटण तालुक्यातील ढेबेवाडी खोर्‍यातून एक धक्कादायक घटना समोर आली आहे. अत्याचारानंतर गरोदर राहिलेल्या मुलीची घरीच प्रसुती करून निर्दयी बापाने जन्मलेल्या बाळाचे शीर धडावेगळे केल्याचा प्रकार पोक्सो गुन्ह्याच्या तपासामध्ये उघड झाला आहे. याप्रकरणी पीडित मुलीच्या पित्यावर ढेबेवाडी पोलीस ठाण्यात गुन्हा दाखल झाला आहे.
पाटण तालुक्यातील ढेबेवाडी खोर्‍यातील एका गावातील अल्पवयीन मुलीवर अत्याचार झाला होता. त्यातून ती साडे आठ महिन्यांची गर्भवती राहिली होती. याप्रकरणी एका तरूणावर पोक्सो अंतर्गत गुन्हा दाखल झाला होता. त्याला न्यायालयाने पोलिस कोठडी सूनावली होती. दरम्यान, तपासाच्या अनुषंगाने पीडित मुलीला वैद्यकीय तपासणीसाठी रूग्णालयात नेण्यात आले असता मुलीच्या पोटात गर्भ नसल्याचे वैद्यकीय अधिकार्‍यांच्या निदर्शनास आले.
बाळाचे शीर केले धडावेगळे
पीडित मुलीच्या पोटात गर्भ नसल्याचे स्पष्ट झाल्यामुळे पोलिसांनी मुलीकडे चौकशी केली. त्यावेळी मुलीने चौकशीत जी माहिती दिली ती ऐकून तपास अधिकारी हादरून गेले. वडिलांनी घरीच प्रसूती केली आणि जन्मलेले बाळ रडल्यामुळे शेजार्‍यांना कळेल म्हणून बाळाचे तोंड दाबून पारळीने त्याचे शीर धडावेगळे केल्याची माहिती पीडित मुलीने दिली. मुलीने दिलेल्या माहितीवरून पोलिसांनी निर्दयी बापावर गुन्हा दाखल करून त्याला अटक केली आहे.
क्रूरतेचा कळस
जन्मलेल्या बाळाचा पारळीने गळा चिरल्यानंतर धडावेगळे केलेले शीर नाल्यामध्ये टाकून पीडित मुलीच्या बापाने पुरावा नष्ट करण्याचा प्रयत्न केला. मात्र, हा प्रकार उघडकीस आल्यानंतर पोलिसांनी घटनास्थळावरून पुरावे गोळा केले. तसेच पीडित मुलीच्या बापाला अटक करून न्यायालयात हजर केले. न्यायालयाने त्याला पोलिस कोठडी सुनावली आहे.
अल्पवयीन मुलीवर अत्याचार करणार्‍याला पोक्सोच्या गुन्ह्यात अटक करण्यात आली आहे. त्याला न्यायालयाने पोलिस कोठडी सुनावली आहे. त्यातच पीडितेच्या बापाला अटक झाली असून तो देखील पोलिस कोठडीत आहे. पोक्सो गुन्ह्याचा तपास महिला सहाय्यक पोलिस निरीक्षक दीपज्योती पाटील करत आहेत. बाळाचा गळा चिरून पुरावा नष्ट केल्याप्रकरणी दाखल झालेल्या गुन्ह्याचा तपास ढेबेवाडीचे सहाय्यक पोलिस निरीक्षक अभिजीत चौधरी करत आहेत.
