बीड दि.४ (प्रतिनिधी)-शहरातील चऱ्हाट फाट्यावरील एका मद्यपीने स्वतःच्या घराला आग लावण्याची घटना शनिवारी (दि.४) सायंकाळी घडली.अग्निशामक दलाने सध्या ही आग आटोक्यात आणली असून मद्यपीच्या या पराक्रमामुळे संपूर्ण घरातील वस्तू जळून खाक झाल्या आहेत.
शहरातील मधुबन बियर बार जवळ नितीन शेळके यांचे स्वतःचे घर असून त्यांना दारूचे प्रचंड व्यसन असल्याची माहिती आहे. शनिवारी दारूच्या नशेत त्यांनी आपल्या स्वतःच्या घराला आग लावली.यात घरातील टीव्ही,फ्रिजसह सर्व संसारउपयोगी साहित्य जळून खाक झाले असून सुदैवाने यात जीवितहानी झाली नाही.घटनेच्या वेळी नितीन शेळके हे एकटेच घरात असल्याची माहिती परिसरातील नागरिकांनी दिली आहे.दरम्यान आग लागल्यानंतर अग्निशामक दलाने ही आग आटोक्यात आणण्यासाठी परिश्रम घेतले. यावेळी लखन विधाते व परिसरातील नागरिकांनाही आग विझविण्यासाठी मेहनत घेतली होती.शिवाजी नगर ठाण्याचे विष्णू चव्हाण,श्री.राडकर,श्री.राठोड,श्री.कप्पे यांनी घटनास्थळी धाव घेऊन पंचनामा केला.
आग लावून ठोकली धूम
दरम्यान घटनास्थळी शिवाजी नगर पोलीस ठाण्याचे कर्मचारी पोहचल्यानंतर त्यांनी आग विझविण्यासाठी अग्निशामक दलाला तात्काळ याची माहिती दिली.त्यानंतर आग आटोक्यात आली.यावेळी पोलिसांनी नितीन शेळकेंचा सर्वत्र शोध घेतला मात्र ते पोलिसांना सापडले नाहीत त्यामुळे श्री.कप्पे याप्रकरणाचा पुढील तपास करीत आहेत.
