भारतीय क्रिकेटच्या इतिहासात जेव्हा कधी सर्वोत्तम यष्टीरक्षक, सर्वोत्तम कर्णधार आणि सर्वोत्तम फिनिशर असणाऱ्या खेळाडूंचा नामोल्लेख केला जाईल त्यावेळी महेंद्रसिंग धोनी हे नाव तिन्ही यादींमध्ये कॉमन दिसून येईल. धोनीने आपल्या करामतींच्या जोरावर अनेक चाहत्यांच्या मनावर अभिराज्य गाजवले आहे.महेंद्रसिंग धोनी त्याच्या करिष्माई कर्णधारपदासाठी जगभरात प्रसिद्ध आहे. त्याने आपल्या शांत आणि हुशार मनाने टीम इंडियासाठी अनेक सामने जिंकले आहेत. 15 ऑगस्ट 2020 रोजी त्याने आंतरराष्ट्रीय क्रिकेटमधून निवृत्ती घेतली, परंतु तो अजूनही आयपीएलमध्ये खेळत आहे. क्रिकेटच्या मैदानानंतर आता महेंद्रसिंग धोनी फिल्मी दुनियेतही आपला जोश दाखवण्यासाठी सज्ज झाला आहे. यासाठी त्याने एक प्रोडक्शन हाऊस उघडले आहे.

फिल्मी दुनियेत दबदबा दाखवेल
महेंद्रसिंगने स्वतःचे प्रोडक्शन हाऊस उघडले आहे. ‘धोनी एंटरटेनमेंट’ या नावाने ते चालणार आहे. LetsCinema ने रविवारी ट्विट करून ही माहिती दिली आहे. त्याने एक फोटो देखील शेअर केला ज्यामध्ये धोनी दिसत आहे आणि त्याच्या प्रोडक्शन हाऊसचे नाव देखील आहे. महेंद्रसिंग धोनीच्या प्रोडक्शन हाऊसच्या पोस्टरनुसार, त्याच्या प्रोडक्शन हाऊसच्या अंतर्गत तेलुगू, मल्याळम आणि तामिळमध्ये चित्रपट बनवले जातील. धोनी आयपीएलमध्ये चेन्नई सुपर किंग्जकडून खेळतो, त्यामुळे तामिळनाडूमध्ये त्याची फॅन फॉलोइंग खूप मोठी आहे. नुकताच महेंद्रसिंग धोनीनेही चेन्नईला भेट दिली. अशा परिस्थितीत त्याचे दक्षिण भारतात असणारे चाहते त्याने तयार केलेल्या सिनेमांना डोक्यावर घेतील अशी अपेक्षा व्यक्त केली जात आहे.