अभिनेत्री जॅकलिन फर्नांडिसच्या (Jacqueline Fernandez) अडचणीत वाढ झाली आहे. सुकेश चंद्रशेखर (Sukesh Chandrashekhar) मनी लाँड्रिंग प्रकरणात अंमलबजावणी संचालनालयाने (ईडी) दाखल केलेल्या आरोपपत्रात जॅकलिन फर्नांडिसचं नाव आरोपी म्हणून लिहिण्यात आलं आहे. सूत्रांकडून मिळालेल्या माहितीनुसार, सुकेश हा गुन्हेगार असल्याची जॅकलिनला आधीच माहिती होती, असा दावा ईडीने केला आहे. सुकेश हा खंडणीखोर (extortionist) आहे हेही तिला माहीत होतं. यामुळेच ईडीने जॅकलिनवर ताशेरे ओढले आहेत. जॅकलिनला याप्रकरणी अद्याप अटक झालेली नाही. कारण आतापर्यंत न्यायालयाने आरोपपत्राची दखल घेतली नसली तरी तिला देशाबाहेर जाण्याची परवानगी दिली जाणार नाही.