परभणी:- काल सार्वजनिक बांधकाम मंत्री अशोक चव्हाण यांच्यासोबत कार्यक्रमात असलेले गंगाखेडचे आमदार डॉ.रत्नाकर गुट्टे यांनाही कोरोनाचा संसर्ग झाला आहे. त्यांना लक्षणे जाणवू लागल्याने त्यांनी स्वतःची कोरोना चाचणी केली असता त्यांचीही कोरोना टेस्ट पॉझिटिव्ह आली आहे .
गंगाखेड येथे काल रेल्वे उड्डाणपुलाच्या उद्घाटनप्रसंगी मंत्री अशोक चव्हाण, खासदार संजय जाधवांसाहित पाचपेक्षा अधिक आमदार गुट्टे यांच्या संपर्कात आले होते. कार्यक्रमानंतर या सर्वच मंडळींनी अशोक चव्हाण यांच्यासह गुट्टेंच्या घरी जेवणही केले. त्यामुळे आपल्या संपर्कात आलेल्यांनी कोरोना चाचणी करून घेण्याचे आवाहन आमदार गुट्टे यांनी केले आहे.
दरम्यान गेल्या महिनाभरात राज्यातील अनेक आमदार, खासदार आणि नेते मंडळींना कोरोनाचा संसर्ग झाल्याच्या बातम्या समोर येत आहेत. राज्यातील डझनभरापेक्षा जास्त आमदारांना आणि नेत्यांना कोरोनाचा संसर्ग झाला असून त्यातील काहीजण बरे झाले आहेत, तर काहींवर अद्यापही उपचार सुरु आहेत.
आतापर्यत राज्यात मंत्री जयंत पाटील, जितेंद्र आव्हाड, काॅंग्रेसचे प्रदेशाध्यक्ष नाना पटोले, खासदार संजय राऊत,माजी खासदार प्रफुल्ल पटेल, माजी मंत्री हर्षवर्धन पाटील, आमदार शिवाजीराव कर्डिले, उदयसिंह रजपूत, आमदार रवींद्र फाटक, माजी आमदार चंद्रदीप नरके यांच्यासह महिला आणि बालकल्याण मंत्री यशोमती ठाकूर, राज्याचे महसूल मंत्री बाळासाहेब थोरात, शालेय शिक्षण मंत्री वर्षा गायकवाड, ऊर्जा राज्यमंत्री प्राजक्त तनपुरे, आदिवासी विकास मंत्री के सी पाडवी, भाजप नेते राधाकृष्ण विखे पाटील, हर्षवर्धन पाटील यांनाही कोरोनाची लागण झाली आहे. यासह १० मंत्री आणि २० कोरोना पाॅझिटिव्ह आमदारांर उपचार सुरु आहेत.
