सोलापूर - बार्शी येथील कोविड केअर सेंटरमध्ये उपचार घेत असलेल्या एका करोनाबाधित इसमाने विलगीकरण केंद्रातच गळफास लावून आत्महत्या केली आहे. मानसिक तणावातून त्यानं हे टोकाचं पाऊल उचलल्याचं समोर आलं आहे.
श्री शिवाजी शिक्षण प्रसारक मंडळ बार्शी संचलित पॉलीटेक्निक कॉलेजमध्ये कोविड केअर सेंटर उभारण्यात आलेले आहे. या कोविड केअर सेंटरमध्ये बार्शी शहर आणि तालुक्यातील कोरोना पॉझिटिव्ह रुग्ण औषध उपचार घेत आहेत. सदरच्या कोविड केअर सेंटरमध्ये औषधोपचार घेणाऱ्या उमेश भागवत कोंढारे (वय ३७ वर्ष रा. चिखर्डे ता. बार्शी) याने संबंधित बिल्डिंगच्या पहिल्या माळ्यावर साडीच्या साहाय्याने गळफास घेऊन आत्महत्या केली आहे.
मृत इसम उमेश कोंढारे हा ३१ मार्च रोजी करोना पॉझिटिव्ह आलेला होता. त्यानंतर चार दिवस त्याने राहत्या घरीच औषध उपचार घेतले होते. मात्र त्याला अस्वस्थ वाटू लागल्याने ३ एप्रिलपासून बार्शी येथील सीसीसीमध्ये औषध उपचारासाठी दाखल केले होते. त्याचबरोबर त्याचे कुटुंबीय त्याची आई, पत्नी व दोन मुले हे देखील करोना पॉझिटिव्ह आढळल्याने त्यांना देखील त्याच कोविड केंद्रामध्ये औषधोपचारासाठी दाखल केलेले होते. काल संध्याकाळपासूनच उमेश हा त्याच्या कुटुंबीयांना माझे काही खरे नाही. मी आता जगत नाही. मला टेन्शन आले आहे. माझ्या मुलांना व्यवस्थित सांभाळा व तुम्ही व्यवस्थित राहा अशी सारखी बडबड करत होता.
त्यानंतर आज सकाळी ४.३० वाजण्याच्या सुमारास त्याने संबंधित बिल्डिंगच्या वरील मजल्यावर असणाऱ्या बाथरूमजवळ साडीच्या साह्याने गळफास घेऊन आत्महत्या केली आहे. याबाबत मयत याची आई व पत्नी यांचे व्हिडिओ ग्राफी केलेले जबाब नोंदविण्यात आले आहेत. त्यांचा कुणावरही संशय अगर तक्रार नसल्याचे त्यांनी स्पष्ट केले आहे.
