नाशिक: शहर व जिल्ह्यात करोनाचा प्रादुर्भाव वाढत असल्यानं सजग राहण्याची गरज असतानाही काही ठिकाणी गलथान कारभार दिसून येत आहेत. नाशिकच्या जिल्हा शल्यचिकित्सक डॉ. रत्ना रावखंडे यांना याच दिरंगाईचा व गलथान कारभाराचा फटका बसला आहे. जिल्हा रुग्णालयांतील असुविधांबाबत समाधानकारक उत्तर न देता आल्यानं रत्ना रावखंडे यांना सक्तीच्या रजेवर पाठवण्यात आलं आहे.
छगन भुजबळ यांच्या उपस्थितीत काल शहर व जिल्ह्यातील करोनाच्या स्थितीचा आढावा घेण्यात आला. यावेळी काही गोष्टी पालकमंत्र्यांच्या निदर्शनास आल्या. नाशिक जिल्ह्यासाठी २२८ व्हेंटिलेटर प्राप्त झाले असून त्यातील केवळ १९६ व्हेंटिलेटर बसवण्यात आलेत. त्यापैकी ग्रामीण मध्ये सात आणि जिल्हा रुग्णालयात सात असे एकूण १४ रुग्ण व्हेंटिलेटरवर रुग्ण उपचार घेत आहेत. जिल्हा रुग्णालयात बसवण्यात आलेल्या ८० व्हेंटिलेटर पैकी फक्त ७ व्हेंटिलेटर वापरात आहेत आणि ७३ व्हेंटिलेटर हे नॉन कोविड भागात विनावापर पडून आहेत. तसेच २३ व्हेंटिलेटर अद्याप कार्यान्वित न करता पडून आहेत. व्हेंटिलेटर न मिळाल्याने एकीकडे रुग्ण दगावत असताना दुसरीकडे जिल्हा रुग्णालयातील अशा हलगर्जीपणामुळे पालकमंत्र्यांनी तीव्र संताप व्यक्त केला.
विभागीय मुख्यालय असलेल्या नाशिक जिल्हा रुग्णालयात केवळ १०० बेड करोनासाठी ठेवण्यात आलेत. त्याचप्रमाणे ग्रामीण भागातील उपजिल्हा रुग्णालय तसेच ग्रामीण रुग्णालयामधील डेडिकेटेड करोना रुग्णालये पूर्ण क्षमतेने सुरू करण्यात आलेली नाहीत. या हलगर्जीपणा आणि दिरंगाई बाब जिल्हा शल्यचिकित्सक डॉ. रत्ना रावखंडे यांच्याकडून समाधानकारक उत्तरे मिळाले नाही.
जिल्ह्यात करोनाची परिस्थिती गंभीर असतांना जिल्हा रुग्णालयाकडून होत असलेल्या दिरंगाई बाबत पालकमंत्री छगन भुजबळ यांनी बैठकीनंतर तातडीने आरोग्य मंत्री राजेश टोपे यांच्याशी संपर्क करून ही गंभीर परिस्थिती त्यांच्या लक्षात आणून दिली. त्यानंतर तासाभरातच जिल्हा शल्यचिकित्सक डॉ.रत्ना रावखंडे यांना सक्तीच्या रजेवर पाठविण्यात आले आहे.
