उल्हासनगर कॅम्प नं-४, २६ सेक्शन परिसरात राहणाऱ्या ४० वर्षीय महिला १५ वर्षाच्या मुलीसह राहत होती. शनिवारी मध्यरात्री महिलेचा खून झाल्याने एकच खळबळ उडाली. विठ्ठलवाडी पोलिसांनी तपासाची चक्र जलद फिरवीत त्याच रात्री २० वर्षाच्या दिलजीत यादव नावाच्या तरुणाला अटक केली. पोलिसांनी दिलजीत यादव याला बोलते केल्यावर, तो महिलेच्या अल्पवयीन मुलीचा प्रियकर निघाला. काही दिवसांपूर्वी दिलजीत यादव याने मुलीला फिरायला घेऊन जाऊन, अश्लील व्हिडीओ काढला. सदर व्हिडीओ महिलेच्या हाती लागल्यावर, संतप्त झालेल्या महिलेने मुलीला चोप देऊन मुलाला भेटण्यास विरोध केला.
याप्रकाराचा मुलीला राग येऊन प्रियकराच्या मदतीने आईचा काटा काढण्यास ठरविले. शनिवारी रात्री आई झोपली असताना, मुलीने आईच्या डोक्यावर विटेचा जोरदार प्रहार केला. त्यावेळी दबा घालून बसलेल्या प्रियकर दिलजीत यादव याने घरात धाव घेऊन महिलेच्या गळ्यावर व इतर ठिकाणी चाकूने वार केले. या मारहाणीत व हल्ल्यात महिलेचा जागीच मृत्यू झाला. विठ्ठलवाडी पोलिसांनी खून झालेल्या महिलेच्या अल्पवयीन मुलीला बोलते केले असता, तिने खुनाची कबुली दिल्याची माहिती वरिष्ठ पोलीस निरीक्षक कन्हेयालाल थोरात यांनी पत्रकारांना दिली.
पोलिसांनी अल्पवयीन मुलीसह तिचा प्रियकर दिलजीत यादव यांना अटक केली. न्यायालयाने यादव याला २७ मार्च पर्यंत पोलीस कस्टडी दिली असून मुलगी अल्पवयीन असल्याने, तिची रवानगी बाल सुधाहरगृह मध्ये करण्यात आली. याप्रकाराने परिसरात खळबळ उडाली होती. अधिक तपास पोलीस करीत आहेत.
