मुंबई: राज्यात करोनाचा प्रादुर्भाव वेगाने वाढत आहे मात्र त्या तुलनेत मृत्यूदर कमी आहे. त्यावरच बोट ठेवत आरोग्यमंत्री राजेश टोपे यांनी लॉकडाऊनबाबत महत्त्वाचे विधान केले आहे. वाढत्या रुग्णसंख्येवर लॉकडाऊन हा पर्याय नसल्याचे टोपे यांनी अगदी स्पष्ट शब्दांत सांगितले. नागरिकांनी अनावश्यक गर्दी टाळायला हवी. करोना नियमांचे पालन करून सहकार्य करायला हवे. त्यासाठी लॉकडाऊनऐवजी निर्बंध अधिक कठोर केले जातील, असेही टोपे यांनी स्पष्ट केले.
राज्यात करोनाने पुन्हा डोके वर काढले आहे. दैनंदिन रुग्णसंख्या झपाट्याने वाढू लागली आहे. यापार्श्वभूमीवर अनेक शहरे आणि जिल्ह्यांत लॉकडाऊनचे कठोर पाऊल उचलण्यात आले आहे. मुख्यमंत्री उद्धव ठाकरे यांनीही नागरिकांनी नियम पाळले नाहीत तर लॉकडाऊनला पर्याय उरणार नाही, असे बजावून सांगितले आहे. याअनुषंगाने आरोग्यमंत्री टोपे यांनी आज अनेक मुद्द्यांवर प्रकाश टाकला. राज्यात बाधित होणाऱ्या एकूण रुग्णांपैकी ८५ टक्के रुग्णांना लक्षणे नाहीत. त्यामुळे त्यातील बहुतांश जणांना गृह विलगीकरणाचा सल्ला देण्यात आला आहे. परिणामी राज्यात सध्या रुग्णालयातील खाटांची कमतरता नाही, असे ते म्हणाले.
संसर्गाचे प्रमाण वाढू नये म्हणून ट्रॅकिंग, टेस्टिंग आणि ट्रीटमेंट या त्रिसूत्रीनुसार काम केले जात असून राज्यात करोना चाचण्यांची संख्या वाढविण्यात येत आहे. लग्न समारंभ, सामाजिक कार्यक्रम आदी ठिकाणी होणारी गर्दी टाळण्यासाठी कडक निर्बंध घातले जात असून नागरिकांनीदेखील स्वयंशिस्तीने गर्दी होणार नाही, याची खबरदारी घ्यावी. सुरक्षित अंतर, मास्कचा वापर आणि वारंवार हात धुणे या करोना प्रतिबंध नियमांचा वापर नागरिकांकडून झाल्यास रुग्णसंख्येला आळा घालू शकतो. त्यामुळे लॉकडाऊन टाळण्याकरिता निर्बंधांचे पालन करावे, असे आवाहन आरोग्यमंत्र्यांनी केले आहे.
राज्यात लसीकरणाला मोठ्या प्रमाणावर गती देण्यात आली असून दररोज किमान सव्वा लाख नागरिकांना करोना प्रतिबंधक लस देण्यात येत आहे. राज्यामध्ये लसीचा तुटवडा नसून खासगी व शासकीय रुग्णालयात लसीकरणाचे प्रमाण वाढविण्याकरिता प्रयत्न केले जात असल्याचे सांगतानाच ६० वर्षांवरील सर्व नागरिकांनी लवकरात लवकर लसीकरण पूर्ण करून घ्यावे, असे आवाहनही आरोग्यमंत्र्यांनी केले.
