उमरगा : मराठा आरक्षणाच्या मागणीसाठी आंदोलन करणारे मनोज जरांगे पाटील यांच्या समर्थनार्थ उमरगा येथील मराठा समाजाच्या कार्यकर्त्यांनी बुधवारी आक्रमक आंदोलन करत तहसीलदारांच्या खुर्चीचे दहन केले. या आंदोलनानंतर पोलिसांनी आंदोलन करणाऱ्या कार्यकर्त्यांना अटक केली.
मनोज जरांगे पाटील यांची प्रकृती खालावत चालल्याच्या पार्श्वभूमीवर मराठा समाजाकडून आंदोलनाची तीव्रता वाढत असल्याचे उमरगा येथील आंदोलनातून दिसून आले. मराठा समाजाच्या कार्यकर्त्यांनी तहसील कार्यालयाच्या आवारात खुर्ची आणून ती पेटवून दिली. यावेळी "एक मराठा, लाख मराठा", "मनोज जरांगे पाटील आगे बढो" अशा घोषणा देत सरकारचा निषेध करण्यात आला.जरांगे पाटील यांच्या आंदोलनाची सरकारने तातडीने दखल घेऊन मराठा आरक्षणाच्या मागणीवर ठोस निर्णय घ्यावा, अशी मागणी आंदोलकांनी केली. तसेच जरांगे पाटील यांच्या प्रकृतीकडे सरकारने गांभीर्याने लक्ष द्यावे, अशी मागणीही करण्यात आली.तहसील कार्यालयाच्या आवारात खुर्ची जाळून आंदोलन केल्यानंतर पोलिसांनी संबंधित आंदोलकांना ताब्यात घेत अटक केली. या कारवाईमुळे काही काळ तहसील कार्यालय परिसरात तणावाचे वातावरण निर्माण झाले होते. मराठा आरक्षणाच्या प्रश्नावर आगामी काळात आंदोलन आणखी तीव्र होण्याची शक्यता व्यक्त होत आहे.
