बारामती दि.२८(प्रतिनिधी): राष्ट्रवादी काँग्रेस नेते आणि उपमुख्यमंत्री अजितदादा पवार यांचे आज (दि.२८ जानेवारी) सकाळी विमान अपघातात निधन झाले. मुंबईवरून बारामती इथं येत असताना बारामती विमानतळावार लँडिंगच्यावेळीच विमानाला भीषण अपघात झाला. त्यात अजित पवार यांच्यासह पाच जणांचा मृत्यु झाला आहे.
दरम्यान राज्याचे उपमुख्यमंत्री अजित पवार यांच्या पार्थिवावर गुरूवारी (दि.२९ जानेवारी) सकाळी ११ वाजता पार पडणार आहे. अंत्यविधी बारामती तालुका पोलीस स्टेशन हद्दीतील विद्या प्रतिष्ठान येथे करण्याचे नियोजन असल्याची माहिती सूत्रांकडून मिळाली आहे. यापूर्वी आज (दि.२८ जानेवारी) अंत्यदर्शनाचा कार्यक्रम बारामती शहर पोलीस स्टेशन हद्दीतील शारदा प्रांगण येथे ठेवण्यात येणार आहे.ही दु:खद घटना समजताच सकाळपासून राज्यासह देशभरातून मोठ्या संख्येने नागरिक, कार्यकर्ते आणि नेतेमंडळी अंत्यदर्शनासाठी उपस्थित राहण्यास सुरूवात झाली आहे.
राज्यभर तीन दिवसांचा दुखवटा घोषित
दरम्यान, अजितदादा पवार यांच्या निधनाने महाराष्ट्रभर शोककळा पसरली असून आज (दि. २८ जानेवारी) राज्यात शासकीय सुट्टी जाहीर करण्यात आली आहे. तसेच अधिकृतरीत्या राज्यभर तीन दिवसांचा दुखवटा घोषित करण्यात आला आहे. पुणे महापालिका आयुक्तांच्या आदेशानुसार आज (दि.२८ जानेवारी) आणि उद्या (दि.२९ जानेवारी) पुणे शहर बंद ठेवण्यात येणार असून, उद्या मार्केटयार्डही बंद राहणार आहे. प्रशासनाकडून शांतता व सुव्यवस्था राखण्याचे आवाहन नागरिकांना करण्यात आले आहे.
