बीड : बीड (Beed) नगरपालिकेच्या निवडणुकीतील संपूर्ण शहराचे लक्ष लागलेल्या आणि हाय व्होल्टेज निवडणूक म्हणून पहिल्या जाणाऱ्या प्रभाग ३(ब ) च्या निवडणुकीबाबत ट्विस्ट निर्माण झाल्याची माहिती आहे. राज्य निवडणूक आयोगाने अपील असलेल्या जागांच्या बाबतीत २२ नोव्हेंबर नंतर ज्यांचे निकाल आले अशा जागांची माहिती मागविली असून येथील निवडणुकीच्या संदर्भाने आता आयोग काय निर्णय घेणार यावर या जागांच्या निवडणुकीचे भवितव्य अवलंबून असणार आहे. (Beed)बीडमधील प्रभाग ३ (ब )मध्ये असेच अपील झाले होते. येथे अमर नाईकवाडे (राष्ट्रवादी ) आणि अमृत सारडा (भाजप ) निवडणुकीच्या रिंगणात आहेत.
न्यायालयीन अपिलांच्या संदर्भाने झालेल्या निर्णयानंतर पैठण नगरपालिकेची संपूर्ण निवडणूक पुढे ढकलण्याची भूमिका राज्य निवडणूक आयोगाने काल (दि. २९ ) उच्च न्यायालयात घेतली होती. त्यानंतर राज्य निवडणूक आयोगाने राज्यभरातून ज्याठिकाणी अपील झाले होते आणि जेथे २२ नोव्हेंबरच्या नंतर निर्णय आला त्या जागांची माहिती आणि अहवाल मागविला आहे. त्यानुसार बीडमधील प्रभाग ३ (ब) च्या जागेचा अहवाल निवडणूक निर्णय अधिकाऱ्यांनी पाठविला आहे. या ठिकाणी राष्ट्रवादीचे अमर नाईकवाडे यांनी भाजपचे अमृत सारडा यांच्या अर्जावर आक्षेप घेतला होता. हा आक्षेप निवडणूक निर्णय अधिकारी आणि न्यायालय दोन्ही ठिकाणी फेटाळला गेला. मात्र न्यायालयाचे आदेश निवडणूक निर्णय अधिकाऱ्यांना २४ नोव्हेंबरला आले आहेत. हे संदेश चिन्ह वाटपाच्या अगोदर आल्याने चिन्ह वाटप झाले असले तरी आता नवीन भूमिकेप्रमाणे निवडणूक आयोग या जागेच्या निवडणुकीच्या संदर्भाने काय निर्देश देते याकडे सर्वांचे लक्ष आहे. याघडीला तरी या प्रभागाच्या निवडणूक स्थगितीबाबत कोणताही निर्णय झालेला नसल्याचे सांगितले जाते.
 

स्थगित झाल्या पुन्हा मतदान कधी
जर राज्य निवडणूक आयोगाने या जागेवरची निवडणूक पुढे ढकलण्याचा निर्णय घेतला तर या जागेसाठी आता २० डिसेंबरला मतदान होऊ शकेल. राज्य निवडणूक आयोगाने वेगवेगळ्या कारणांसाठी जेथील निवडणूक पुढे ढकलावी लागली त्यासाठी नव्याने कार्यक्रम जाहीर केला असून त्यात ४ ते १० तारखेपर्यंत उमेदवारी अर्ज मागे घेणे तसेच आवश्यक असल्यास २० डिसेंबरला मतदान आणि २१ रोजी मतमोजणी असा कार्यक्रम जाहीर केला आहे. त्यामुळे या प्रभागाची निवडणूक जर आता स्थगित झाली तर ती २० रोजी होऊ शकेल