बीड दि. २८ (प्रतिनिधी ) : राज्यातील स्थानिक स्वराज्य संस्थांच्या निवडणुकांवर असलेली टांगती तलवार बाजूला करत आता सर्वोच्च न्यायालयाने स्थानिक स्वराज्य संस्थांच्या निवडणुकांचा मार्ग मोकळा केला आहे. कोणत्याही निवडणूक कार्यक्रमाला स्थगिती नसल्याचे सांगतानाच ज्या जिल्हापरिषदांमध्ये ५० % आरक्षण मर्यादेचे उल्लंघन होत नाही , तेथे आयोग त्यांच्या पूर्वनियोजित कार्यक्रमाप्रमाणे निवडणूक घेऊ शकतो असेही न्यायालयाने स्पष्ट केले आहे.त्यामुळे आता राज्यात दोन टप्प्यात जिल्हापरिषद निवडणुका होऊ शकतील असे संकेत आहेत. जेथे आरक्षण मर्यादेचे उल्लंघन झालेले नाही अशा ठिकाणी आयोग केव्हाही निवडणूक कार्यक्रम जाहीर करू शकतो तर जेथे वाढीव आरक्षण आहे , तेथे न्यायालयाच्या पुढील सुनावणीची वाट पाहणे किंवा फेर आरक्षण सोडत काढणे असे पर्याय असू शकतात .
राज्यातील स्थानिक स्वराज्य संस्थांमध्ये अनेक ठिकाणी ५०% आरक्षण मर्यादेचे उल्लंघन झाल्याचे सांगत वाढीव आरक्षणानुसार निवडणूक न घेण्याची मागणी करणाऱ्या याचिकांवर सध्या सर्वोच्च न्यायालयात सुनावणी सुरु आहे. यापूर्वी न्यायालयाने राज्य निवडणूक आयोगाला सुनावणी पूर्ण होईपर्यंत पुढील निवडणूक कार्यक्रम घोषित करू नये असे सुचविले होते. दरम्यान शुक्रवारी झालेल्या सुनावणी नंतर न्यायालयाने या प्रकरणात कोणत्याही निवडणूक कार्यक्रमास स्थगिती नसल्याचे स्पष्ट केले, मात्र या ३ सदस्सीय पीठाकडे वर्ग करण्यात येत असून सध्याच्या निवडणुकांचा निकाल या याचिकेच्या निकालावर अवलंबून असेल असे स्पष्ट केले आहे.
जिल्हापरिषदांबद्दल विशेष उल्लेख
निकालामध्ये सुस्पष्टता यावी यासाठी जिल्हापरिषद निवडणुकीच्या संदर्भाने न्यायालायने स्वतंत्र निर्देश द्यावेत अशी विनंती करण्यात आल्यानंतर जेथे आरक्षण मर्यादा ५० % च्या आत आहे अशा सर्व ठिकाणी राज्य निवडणूक आयोग त्यांच्या पूर्वनियोजनाप्रमाणे निवडणूक घेऊ शकते असे न्यायालयाने स्पष्ट केले आहे. मात्र कोणत्याही परिस्थितीत आरक्षण मर्यादेचे उल्लंघन चालणार नाही असेही न्यायालयाने बजावले आहे.
या जिल्हापरिषदांना नाही आरक्षण मर्यादेची अडचण
राज्यातील ज्या जिल्हापरिषदांमध्ये आरक्षण ५० % च्या आत आहे त्यात मराठवाड्यातील बीड, धाराशिव, छत्रपती संभाजी नगर , जालना, परभणी यासह राज्यातील अहिल्यानगर, रायगड, पुणे, सोलापूर, कोल्हापूर, सातारा, सांगली, सिंधुदुर्ग, रत्नागिरी या जिल्हापरिषदांचा समावेश आहे. त्यामुळे पहिल्या टप्प्यात येथील निवडणुका होऊ शकतात .
