मांजरसुंबा दि.१३ (वार्ताहार): बीड (Beed) तालुक्यातील लिंबागणेश येथील अहमदपूर- नगर राष्ट्रीय महामार्गावरील शिवम मशीनरी अॅन्ड इलेक्ट्रिकल्स या दुकानात बुधवार (दि.९) रोजी रात्री चोरीची घटना घडली असून, चोरट्यांनी दुकान फोडून ५ लाखांचा ऐवज(Crime) लंपास केला. 

         श्रीराम पाठक गेवराई येथे (Beed police)नातेवाईकांच्या लग्नास गेल्यामुळे दुकान दिवसभर बंद होते. गुरुवारी सकाळी अशोक वायभट यांनी फोन करून दुकानाचे शटर तुटले असल्याची माहिती पाठक यांना दिली.त्यांनी तात्काळ दुकानात धाव घेतली असता, चोरट्यांनी दुकानाचे शटर तोडून आत प्रवेश करून वायंडिंग वायर, स्क्रॅप यासह एकूण अंदाजे ५ ते ६ लाख रुपयांचा माल लंपास केल्याचे समोर आले. तसेच दुकानातील गल्ला फोडून त्यामधील ५ ते ६ हजार रुपये लंपास केल्याचे समोर आले. घटनेची माहिती मिळताच नेकनूर पोलीस ठाण्याचे पोउनि. अप्पासाहेब रोकडे, पो. विशाल क्षीरसागर तसेच लिंबागणेश पोलीस चौकीचे स.फौ. बाबासाहेब राख, गोविंद बडे यांनी घटनास्थळी भेट देऊन पंचनामा केला. सपोनि. चंद्रकांत गोसावी यांच्या मार्गदर्शनाखाली पुढील तपास सुरू आहे.