नव्या सरकारचा शपथविधी गुरुवारी पार पडला. आता शनिवारी (7 डिसेंबर) पासून राज्याचे विशेष अधिवेशन सुरु होत आहे. नव्या विधानसभा अध्यक्षांची 9 डिसेंबरला निवड होणार असून त्यासाठी भाजपकडून 8 डिसेंबरला दुपारी 12 वाजेपर्यंत अर्ज भरला जाणार आहे. राहुल नार्वेकर यांना पुन्हा संधी मिळणार की नवा अध्यक्ष होणार याकडे सर्वांचे लक्ष लागले आहे.

महाराष्ट्रात एकनाथ शिंदे यांच्या शिवसेनेचं आणि भाजपचं सरकार स्थापन झाल्यानंतर विधानसभा अध्यक्ष भाजपनं त्यांच्याकडे घेतलं होतं. भाजपनं त्यावेळी राहुल नार्वेकर यांना अध्यक्षपदाची जबाबदारी दिली होती. आता पुन्हा एकदा राहुल नार्वेकर यांच्याकडे विधानसभेचं अध्यक्षपद जाऊ शकतं, अशी सूत्रांची माहिती आहेत राहुल नार्वेकर हे कुलाबा विधानसभा मतदारसंघातून भाजपकडून सलग दुसऱ्यांदा विजयी झाले आहेत.7, 8 आणि 9 डिसेंबरला विधानसभेचे विशेष अधिवेशन बोलविण्यात येणार आहे. या अधिवेशनात देवेंद्र फडणवीस सरकारला बहुमत सिद्ध करावे लागेल, 7 आणि 8 डिसेंबरला आमदारांचा शपथविधी पार पडणार असल्याची माहिती आहे. दरम्यान विधानसभेच्या नव्या अध्यक्षांची निवड 9 नोव्हेंबरला केली जाणार आहे. पण त्याआधी 8 डिसेंबरला अर्ज दाखल केला जाणार आहे.

महाराष्ट्राच्या विधानसभा निवडणुकीत महायुतीला बहुमत मिळाले आहे, भाजपला 132, शिवसेना शिंदे गटाला 57 आणि राष्ट्रवादी काँग्रेस (अजित पवार) या पक्षाला 41 जागांवर विजय मिळाला. मित्रपक्षांसह महायुतीच्या आमदारांची संख्या 236 इतकी झाली आहे. मात्र विधानसभा अध्यत्रपद कुणाकडे जाणार याची चर्चा सुरु झाली होती. पण भाजपकडून राहुल नार्वेकरांना पुन्हा संधी मिळणार की नवा चेहरा समोर येणार याकडे सर्वांचे लक्ष लागले आहे.

दरम्यान विधानसभेच्या आमदारांच्या शपथविधीची विधानभवनात तयारी सुरू झाली आहे. निवडून आलेले प्रतिनिधी विधिमंडळाच्या विशेष अधिवेशनात आमदारकीची शपथ घेतील. तत्पूर्वी विधानसभेच्या हंगामी अध्यक्षपदावर भाजपाचे ज्येष्ठ आमदार कालिदास कोळंबकर यांची नियुक्ती करण्यात आली आहे.