महायुतीमधील घटक पक्षाचे नेते आणि शेतकरी नेते सदाभाऊ खोत यांनी राष्ट्रवादी काँग्रेस शरद पवार गटाचे सर्वेसर्वा शरद पवार यांच्याबाबत वादग्रस्त वक्तव्य केले होते. सदाभाऊ खोत यांनी शरद पवार यांच्या शारीरिक व्यंगावरून टीका केली. सदाभाऊ खोत यांची जीभ घसरल्यानंतर त्यांच्यावर महाविकास आघाडीकडून जोरदार टीका केली जात आहे. अशामध्ये आता सदाभाऊ खोत यांनी या वक्तव्याबाबत दिलगिरी व्यक्त केली आहे. 'भाषणात शरद पवार यांच्यावर बोलताना मी जी भाषा वापरली ती गावगड्याची भाषा आहे. या भाषेमुळे कोणाच्या भावना दुखावल्या असतील तर मी दिलगिरी व्यक्त करतो.', असे सदाभाऊ खोत यांनी सांगितले.