धाराशिव : तुळजापूर मातेच्या दर्शनाला गेलेल्या भाविकांच्या गाडीला भीषण अपघात झाला. या अपघातात एका भाविकांचा मृत्यु झाला, तर आठ भाविक जखमी झाले आहेत. हा अपघात तुळजापूर - सोलापुर महामार्गावर नळदुर्गजवळ आज दुपारच्या सुमारास घडला. 

सध्या नवरात्रोत्सव असल्याने या कालावधीत देवीच्या दर्शनाला जाणाऱ्या भाविकांची संख्या मोठी आहे. देवीच्या वेगवेगळ्या स्थळ किंवा कुलदेवतेवर जाऊन दर्शनाचा लाभ भाविक घेत आहेत. दरम्यान (Tulja Bhavani) तुळजा भवानी मातेचे दर्शन घेऊन परतलेल्या भाविकांची गाडी व जेवळी येथुन चिवरीच्या लक्ष्मी देवीच्या दर्शनासाठी जात असलेल्या भाविकांच्या गाडीला अपघात झाला. कार व रिक्षाची समोरासमोर धडक होऊन हा (Accident News) अपघात झाला. 

कार आणि रिक्षाची समोरासमोर धडक होवुन झालेल्या अपघातात एकाचा मृत्यु झाला तर आठजण जखमी झाले आहेत. कारमधील प्रवासी तुळजापूर येथे तुळजाभवानी मातेचे दर्शन घेवुन बिदरकडे जात होते. तर रिक्षामधील प्रवाशी जेवळी येथुन चिवरीच्या लक्ष्मी देवीच्या दर्शनासाठी जात असताना रिक्षाला ओव्हरटेक करताना हा अपघात झाला. या अपघातात जखमी ६ जणांना सोलापूरला रुग्णालयात दाखल केले. तर उर्वरित रुग्णांवर नळदुर्ग उपजिल्हा रुग्णालयात उपचार सुरू आहेत.