परभणी- परतुर तालुक्यातील ब्राह्मणवाडी येथून काही भाविक मानवत तालुक्यातील यशवाडी येथे दर्शनासाठी आले होते . दर्शन घेऊन गावाकडे परत जात असताना त्यांच्यावर शनिवारी (१६ डिसेंबर) रोजी रात्री साडेअकरा वाजण्याच्या सुमारास पाथरी तालुक्यातील वडी पाठीवर काळाने घाला घातला .
हादगावकडून ऊसाने भरलेले ट्रॅक्टर पाथरीच्या दिशेने येत होते. यावेळी ट्रॅक्स जीप आष्टीच्या दिशेने जात असताना राष्ट्रीय महामार्ग क्रमांक ६१ वर पाथरी तालुक्यातील आष्टी फाट्यावर जीपचा व ट्रॅक्टरचा अपघात झाला. यामध्ये जीपमध्ये बसलेल्या नऊ पैकी तिघांचा जागीच मृत्यू झाला. तर सहा जण गंभीर जखमी झाले आहेत. अपघात एवढा भीषण होता की वेगामुळे ट्रॅक्टर व ट्रॉलीच्या मध्ये क्रूजर गाडी दाबली गेली. दोन जेसीबींच्या मदतीने वाहनांना वेगळे करण्यात आले. त्यानंतर जखमींना पाथरी ग्रामीण रुग्णालयामध्ये दाखल करण्यात आले.
