टीव्ही इंडस्ट्रीतून दु:खद बातमी समोर येत आहे. सीआयडीमध्ये फ्रेडरिक्सची भूमिका साकारणारे अभिनेते दिनेश फडनीस यांचे निधन झाले आहे. दिनेश फडनीस यांचे सोमवारी मुंबईमध्ये उपचारादरम्यान निधन झाले. ते ५७ वर्षांचे होते. त्यांच्या निधनामुळे टीव्ही इंडस्ट्रीवर शोककळा पसरली आहे. सध्या सोशल मीडियावर पोस्ट करत त्यांचे चाहते आणि सेलिब्रिटी त्यांना श्रद्धांजली वाहत आहेत.
दिनेश फडनीस यांचे मुंबईतील तुंगा रुग्णालयात उपचारादरम्यान निधन झाले आहेत. सोमवारी रात्री १२ वाजता त्यांनी जगाचा निरोप घेतला. दिनेश यांना हृदयविकाराचा तीव्र झटका आला होता. त्यानंतर कुटुंबीयांनी त्यांना उपचारासाठी तुंगा रुग्णालयामध्ये दाखल केले होते. प्रकृती गंभीर असल्यामुळे त्यांना व्हेंटिलेटरवर ठेवण्यात आले होते.सोमवारी रात्री उपचारादरम्यान त्यांची प्राणज्योत मालवली.
दिनेश फडनीस यांच्या पार्थिवावर आज अंत्यसंस्कार करण्यात येणार आहे. बोरीवली पूर्वच्या दौलतनगर स्मशानभूमीत त्यांच्या पार्थिवावर अंत्यसंस्कार करण्यात येणार आह. त्यांच्या निवासस्थांनी सीआयडीची संपूर्ण टीम दाखल झाली आहे. त्यांच्या निधनानंतर सध्या सोशल मीडियावर पोस्ट करत चाहते दु:ख व्यक्त करत आहेत.
