बीड - शहरातील नवी भाजी मंडई भागातील भारत सॉ मिलशेजारी एका फ्रूट गोदामामध्ये मंगळवारी (दि.५) पहाटेच्या सुमारास ५.३० वाजता अज्ञात कारणावरून भीषण आग लागली. या आगीत व्यापाऱ्यांचे लाखो रुपयांचे नुकसान झाले आहे.

समीर बागवान, युनूस बागवान, अकबर बागवान या व्यापाऱ्यांचे नवी भाजी मंडई भागात फ्रूट गोदाम आहेत. या गोदामाला अज्ञात कारणावरून आग लागली. गोदामामधील कागदी पुठ्ठे, बारदाना यामुळे आगीने अधिकच पेट घेतल्याने परिसरात धुराचे तांडव पाहायला मिळाले ही आग रोखण्यासाठी अग्निशामक विभागाचे पथक पाचारण करण्यात आले. आग आटोक्यात आणली, परंतु, आगीत मोठे नुकसान झाले आहे. ही आग रोखण्यासाठी इकबाल शेख, आडत मार्केटचे अध्यक्ष जुबेर बागवान, हाशम बागवान, शेख जलील, शारेक जकेरिया शेख इम्रान, शेख रेहान यांच्यासह स्थानिक नागरिकांनी प्रयत्न केले.