बीड दि. २० (प्रतिनिधी ) बीडचे स्थानिक गुन्हे शाखेचे पोलीस निरीक्षक सतीश वाघ यांच्यासह जिल्ह्यातील पाच पोलीस निरीक्षकांच्या जिल्ह्याबाहेर बदल्या करण्यात आल्या आहेत. तर जिल्ह्यात नव्याने ५ पोलीस निरीक्षकांना नियुक्ती देण्यात आली आहे.
औरन्गाबाद परिक्षेत्राचे विशेष पोलीस महानिरीक्षक ज्ञानेश्वर चव्हाण यांनी पोलीस निरीक्षक दर्जाच्या अधिकाऱ्यांच्या बदल्या केल्या आहेत. त्यात बीडचे एएलसीबीचे पोलीस निरीक्षक सतीश वाघ यांची औरंगाबाद ग्रामीण येथे बदली करण्यात आली आहे. त्यासोबतच प्रशांत शिंदे, हेमंत कदम यांची औरंगाबाद ग्रामीण , रवींद्र पेरगुलवार जालना तर वासुदेव मोरे यांची उस्मानाबाद येथे बदली करण्यात आली आहे. तर जिल्ह्यात नव्याने पाच पोलीस निरीक्षक येणार आहेत. यात औरंगाबादहून देविदास गात , संतोष खेतलमास , अशोक मुदिराज , जालन्याहून शिवाजी बंटेवाड तर उस्मानाबादहून आजिनाथ काशीद यांचा समावेश आहे.
