उमेश कोकाटे
मांजरसुंबा-धुळे-सोलापुर हायवेवरती मांजरसुंबा येथे सकाळी साडेनऊच्या सुमारास एका ट्रकने दिलेल्या धडकेत वृद्धासह दोन म्हशी जागीच ठार झाल्याची घटना शनिवारी (दि.२१) सकाळी समोर आली.नेकनूर पोलिसांनी अपघातानंतर घटनास्थळी धाव घेऊन पंचनामा केला.
उदंड वडगाव (शिवाजीनगर) येथील भानुदास वाघिरे हे आपल्या जनावरांसह शेतात पायी जात असताना सोलापूर कडून आलेला ट्रक क्र. (आर.जे.४० जी.ए ३९४६) ने वाघिरे व त्यांच्या दोन म्हशीना जोराची धडक दिल्याने ते सर्व जण यात जागीच गतप्राण झाले.घटनेनंतर ट्रक चालकाने तेथून पळ काढला असून आरोपीच्या अटकेसाठी ग्रामस्थांनी प्रशासनाविरोधात ठिय्या मांडला.यामुळे रस्त्यावर वाहनांच्या लांबच्या लांब रांगा लागल्या होत्या.
आयआरबीचा बेजबारदारपणामुळे ग्रामस्थांमध्ये चीड
दरम्यान अपघातानंतर घटनास्थळी आयआरबी कंपनीचा बेजबाबदारपणा समोर आल्याने ग्रामस्थांमध्ये प्रचंड चीड निर्माण झाली होती.अपघात घडल्यानंतर तब्ब्ल एक तासाने या ठिकाणी क्रेन पोहचल्याने नागरिकांनी आक्रमक भूमिका घेतली.घटनास्थळी नेकनुर पोलिसांसह मांजरसुंबाचे वाहतूक पोलीस आले असून आरोपीविरोधात गुन्हा दाखल करण्याची प्रक्रिया सुरु आहे.
