आयपीएलचा 15वा हंगाम सुरू होण्यापूर्वीच चाहत्यांसाठी मोठी बातमी समोर येत आहे. आयपीएलचे सर्व सामने प्रेक्षकांशिवाय खेळवले जाऊ शकतात. यापूर्वी 25% चाहत्यांच्या परवानगीने ही स्पर्धा सुरू करण्याची चर्चा होती, मात्र महाराष्ट्र सरकार येत्या काही दिवसांत ही परवानगी मागे घेऊ शकते.

वास्तविक, केंद्र सरकारने महाराष्ट्र सरकारला राज्यात कोविड-19 च्या नव्या धोक्याबद्दल इशारा दिला आहे, ज्याचा परिणाम आयपीएलवरही होऊ शकतो. महाराष्ट्राचे आरोग्य मंत्री राजेश टोपे यांनी एएनआयला सांगितले की, 'केंद्र सरकारकडून आम्हाला सतर्क राहण्याचे पत्र मिळाले आहे. युरोपीय देश, दक्षिण कोरिया आणि चीनमध्ये कोविड-19 चे रुग्ण वाढले आहेत. हे लक्षात घेऊन आरोग्य विभागाने सतर्क राहून आवश्यक ती पावले उचलण्याचे पत्र दिले होते. मात्र, आम्ही सध्या आयपीएल सामन्यावर टिप्पणी करू इच्छित नाही.

आधीही 25% चाहत्यांना प्रवेश
महाराष्ट्र सरकारने बीसीसीआयसोबतच्या बैठकीत 15 एप्रिलपर्यंत होणाऱ्या सामन्यांमध्ये 25 टक्के प्रेक्षकांना प्रवेश देण्याचा निर्णय घेतला होता. 15 एप्रिलनंतर होणाऱ्या सामन्यांबाबत बैठकीत निर्णय झालेला नाही.

लीगचे 70 सामने महाराष्ट्रात
आयपीएलचे 70 सामने महाराष्ट्रात खेळवले जातील. यातील 55 सामने मुंबईत तर 15 सामने पुण्यात होणार आहेत. 20 सामने मुंबईच्या वानखेडे स्टेडियमवर आणि डॉ. डीवाय पाटील स्टेडियमवर, तर 15 सामने ब्रेबॉर्न स्टेडियमवर होणार आहेत. उर्वरित 15 सामने पुण्यातील एमसीए आंतरराष्ट्रीय स्टेडियमवर होणार आहेत.
अहमदाबादच्या नरेंद्र मोदी स्टेडियमवर प्लेऑफ आणि अंतिम सामना होणार असल्याच्या बातम्या आहेत, परंतु बीसीसीआयने अद्याप अधिकृत माहिती दिलेली नाही. स्पर्धेचा अंतिम सामना 29 मे रोजी होणार आहे.

दोन नवीन आयपीएल संघ लखनौ सुपर जायंट्स आणि गुजरात टायटन्स संघ 28 मार्चपासून त्यांच्या मोहिमेला सुरुवात करतील. या दिवशी या दोन्ही संघांमधील सामना वानखेडेवरच होणार आहे.