जालना दि.4 नोव्हेंबर – जालना येथील मियाँसाहेब दर्गा परिसरात मोठ्या भावाने लहान भावाच्या डोक्यात कुऱ्हाडीने वार करून त्याची हत्या केल्याची घटना उघडकीस आली आहे. शेख शोजेब शेख मन्सूर असे मयताचे नाव आहे.

जालना शहरातील मस्तगड येथे मियाँसाहेब दर्गा भागात राहणारे शेख खोसरी शेख मन्सूर आणि शेख शोजेब शेख मन्सूर हे दोघे कुटुंबीयांसह राहतात. मयत शोजेब शेख मन्सूर हा मानसिक रुग्ण होता. त्यांच्यात नेहमीच किरकोळ वाद होत असत. मंगळवारीही रात्री त्यांच्यात वाद झाला. त्यात रागाच्या भरात मोठा भाऊ शेख खाेसरी याने लहान भाऊ शेख शोजेब मन्सूर याच्या डोक्यात कुऱ्हाडीने वार केल्याने त्याचा जागीच मृत्यू झाला.

माहिती मिळताच कदीम ठाण्यातील पोलिसांनी घटनास्थळी धाव घेतली. पंचनामा करून मृतदेह उत्तरीय तपासणीसाठी जिल्हा रुग्णालयात हलविला. याप्रकरणी बुधवारी रात्री उशिरापर्यंत कदीम पोलिस ठाण्यात गुन्हा दाखल केला नव्हता. यावेळी जालन्याचे पोलीस उपविभागीय अधिकारी नीरज राजगुरु यांनी भेट देऊन अधिक माहिती जाणून घेतली.