नाशिकमध्ये ऑगस्ट २०२७ मध्ये सिंहस्थ कुंभमेळा होणार आहे. राज्य सरकार व नाशिक महानगरपालिका त्याची जोरदार तयारी करत आहे. दरम्यान, कुंभमेळ्यात सहभागी होणाऱ्या साधू-महंतांच्या वास्तव्यासाठी तपोवनात साधूग्राम तयार केलं जातं आहे. त्यासाठी तपोवनातील १८०० भली मोठी व दुर्मिळ झाडं तोडली जाणार आहेत. मात्र, याला नाशिककर, निसर्गप्रेमी, समाजसेवी संघटनांनी जोरदार विरोध केला आहे. अभिनेते तथा सामाजिक कार्यकर्ते सयाजी शिंदे यांनी देखील या वृक्षतोडीला विरोध केला आहे.

सयाजी शिंदे यांनी आज (२९ नोव्हेंबर) तपोवनाला भेट देत तिथल्या वृक्षांची पाहणी केली. त्यानंतर त्यांनी प्रसारमाध्यमांशी संवाद साधला. यावेळी सयाजी शिंदे यांनी सरकारला इशारा दिला आहे की “आम्ही तुम्हाला इथलं एकही झाड तोडू देणार नाही.”

सयाजी शिंदेंचा गिरीश महाजनांना इशारा
अभिनेते सयाजी शिंदे म्हणाले, “मला इथल्या काही लोकांनी सांगितलं की सरकार इथं प्रदर्शन केंद्र उभारणार आहे. याबद्दल मंत्री गिरीश महाजन यांनी उत्तर द्यायला हवं. तुम्ही एक जबाबदार व्यक्ती आहात, तुमचं आणि माझं काही वैर नाही आणि असलं तरी मला काही फरक पडत नाही. कारण इथे प्रश्न झाडांचा आहे. त्यामुळे ‘इथली झाडं तोडू आणि दुसरीकडे नवी झाडं लावू’ अशी वक्तव्ये तुम्ही करू नका.”

झाडांशिवाय इतर कोणालाही सेलेब्रिटी मानत नाही : सयाजी शिंदे
“सरकारने ही जमीन ३०-३५ वर्षांसाठी देण्यासंदर्भात निविदा काढल्या आहेत. या सगळ्याला आमचा विरोध आहे. मुळात हा साधूग्राम कुठला, हा कुंभमेळा कुठला, आम्हाला याची काहीही माहिती नाही. या जगात झाडं हेच सगळ्यात मोठे सेलेब्रिटी आहेत. आम्ही इतर कुठल्याही सेलेब्रिटीला मानत नाही. जो जगावतो तोच सेलेब्रिटी. जो आपल्याला सावली, ऑक्सिजन, फळं, फुलं देतो तोच खरा सेलेब्रिटी. मी आज इथे कुठलाही सेलेब्रिटी म्हणून नव्हे तर एक माणूस म्हणून आलो आहे. या सर्व आंदोलकांच्या आणि नाशिककरांच्या बाजूने उभा राहण्यासाठी इथे आलो आहे.”