बीड दि.२८ (प्रतिनिधी):-बीडमध्ये पोलिसांच्या दुर्लक्षातून स्पाच्या नावाखाली घरपोच मसाजची 'मॅजिक' चालवत सुरु असलेल्या वेगळ्याच 'मोमेन्ट'वर प्रजापत्रच्या माध्यमातून प्रकाश टाकल्यानंतर काळेधंदे करणारे 'गोरे' चेहरे समोर आले होते.अखेर आता या प्रकरणात संरक्षणकडूनच आशीर्वादाचा हात काढून घेण्याच्या हालचाली झाल्यानंतर बीडमध्ये सुरु असलेली होमसर्व्हिस 'मोमेन्ट' सध्या तरी बंद झाली आहे.
बीडमध्ये मागच्या काळात नाव स्पाचे आणि प्रत्यक्षातल्या वेगळ्याच 'मोमेन्ट' च्या होम सर्व्हिसची 'मॅजिक' जोरात सुरु होती.अगदी अनेक ठिकाणी पोस्टर लावून त्यावर फोन क्रमांक दिले जायचे आणि त्यावर संपर्क केल्यास लगेच घरी येऊन 'मसाज' करू शकणाऱ्यांची उत्तेजक छायाचित्रे पाठविली जायची, त्याच्या सोबत लगेच एक तास, दोन तास आणि अगदी पूर्णवेळ असे रेटकार्ड देखील पाठवले जायचे.हे सारे इतके खुल्लमखुल्ला,की जणू काही एखादा नोंदणीकृत व्यवसाय असावा असे सुरु होते. बरं हे सारे काळे धंदे करणारे 'गोरे' लोक व्यवस्थेतीलच काहींच्या आशीर्वादाने सरेआम हे धंदे करत असतानाही त्यावर कारवाई तर दूर साधे डोळे वटारून पाहण्याची धमक देखील व्यवस्था दाखवायला तयार नव्हती.स्वतःला 'स्पा'चे जनक म्हणविणारे काही लोक या धंद्यांमध्ये आतबाहेर गुंतलेले असल्याने आणि अनेकांचे आशीर्वाद पाठिशी राहिल्याने बीड शहरात या होम सर्व्हिसचा माजलेला सुळसुळाट 'प्रजापत्र' ने समोर आणला होता.त्यानंतर अखेर व्यवस्थेमधल्याच काहींनी थेट 'आता थांबवा हे सारे' सांगणारा 'मॅजिक' मेसेज पाठविला असल्याची माहिती असून त्यानंतर 'मोमेन्ट' पुरविणारा संपर्क क्रमांक बंद झाला असल्याची माहिती आहे.
