नाशिक: आगामी मुंबई महानगरपालिका निवडणुकीसाठी शिवसेना उद्धव बाळासाहेब ठाकरे पक्षाचे प्रमुख उद्धव ठाकरे आणि मनसे अध्यक्ष राज ठाकरे हे दोन ठाकरे बंधू एकत्र येणार, हे जवळपास निश्चित झालं आहे. मात्र मनसेचा महाविकास आघाडीत समावेश होण्याची शक्यता धूसर मानली जात आहे. अशातच नाशिकमध्ये मोठी राजकीय घडामोड घडली असून आगामी स्थानिक स्वराज्य संस्थांच्या निवडणुका महाविकास आघाडी आणि मनसे एकत्र लढणार असल्याची घोषणा करण्यात आली आहे.

     राज्यात मनसे अजून महाविकास आघाडीत अधिकृतपणे सामील झालेली नसताना, नाशिकमध्ये भाजपला रोखण्यासाठी ही युती करण्यात आल्याचं पदाधिकाऱ्यांनी स्पष्ट केलं आहे. काँग्रेसच्या वरिष्ठ पातळीवर भूमिका स्पष्ट नसतानाही नाशिकमधील काँग्रेस आणि मनसेच्या नेत्यांनी पत्रकार परिषदेत एकत्र येऊन ही घोषणा केली. मनसे नेते दिनकर पाटील यांनी लोकशाही जिवंत ठेवण्यासाठी ही आघाडी आवश्यक असल्याचं म्हटलं आहे.नाशिकमध्ये नगरपरिषद आणि नगरपंचायत निवडणुका महाविकास आघाडी आणि मनसे एकत्र लढवणार आहेत. ही घोषणा महाविकास आघाडीच्या नेत्यांनी पत्रकार परिषदेत केली. भाजपला रोखणं हा या आघाडीमागील मुख्य उद्देश असल्याचं त्यांनी सांगितलं. राज्यात मनसे महाविकास आघाडीत अधिकृतपणे सामील झालेली नसताना आणि याबाबत वरिष्ठ पातळीवर मतभेद असताना, नाशिकमध्ये मात्र स्थानिक पातळीवर ही युती प्रत्यक्षात उतरली आहे. विशेष म्हणजे, काँग्रेसच्या वरिष्ठ पातळीवर या आघाडीला विरोध करण्यात आला आहे. असं असूनही, नाशिकमधील काँग्रेस आणि मनसेचे नेते एकाच पत्रकार परिषदेत सहभागी झाले होते. यामुळे राजकीय वर्तुळात चर्चांना उधाण आलं आहे.

या संदर्भात काँग्रेसचे नेते राहुल दिवे यांनी स्पष्ट केलं की, या युतीचा प्रस्ताव वरिष्ठ पातळीवर पाठवला जाईल आणि त्यांच्याकडून जो निर्णय येईल, तो मान्य असेल. त्यामुळे, मनसेसोबतच्या महाविकास आघाडीच्या युतीबाबत काँग्रेसची अंतिम भूमिका काय असेल, हे पाहणं महत्त्वाचं ठरणार आहे.दरम्यान, मनसे नेते दिनकर पाटील यांनी या आघाडीचं समर्थन केले. ते म्हणाले की, "लोकशाही जिवंत ठेवण्यासाठी ही आघाडी करण्यात आली आहे. देशात मत चोरीवर सरकार आले आहे. जवळपास 96 लाख दुबार मतदार असल्याचंही पुढे आले आहे. शिवसेना उद्धव बाळासाहेब ठाकरे पक्ष आणि आम्ही नाशिकमध्ये गुन्हेगारीविरोधात मोर्चा काढला होता. मनसे हा केवळ एक पक्ष नसून जनतेचा आवाज आहे आणि हा आवाज आता महाविकास आघाडीच्या स्वरूपात नाशिकभर घुमणार आहे," असंही पाटील यांनी म्हटलं आहे.