नगर तालुक्यात एक खळबळजनक प्रकार समोर आलेला असून चोर समजून तीन जणांना बेदम मारहाण केल्यानंतर त्यातील एका व्यक्तीचा मृत्यु झालेला आहे. नगर तालुक्यातील पांगरमल येथे हि घटना घडली असून २० ते २५ जणांच्या विरोधात एमआयडीसी पोलिसात गुन्हा दाखल करण्यात आलेला आहे. चांगदेव नामदेव चव्हाण असे मयत व्यक्तीचे नाव आहे.
अधिक माहिती अशी कि, नगर तालुक्यातील पांगरमल येथे गेल्या काही महिन्यांपासून जनावरांची चोरी होण्याचे प्रमाण वाढलेले होते. पोलिसांना अनेकदा निवेदने देऊन देखील असे प्रकार घडत असल्याने ग्रामस्थ देखील अशा घटनेवर लक्ष ठेवून होते याचवेळी गावात चोर आल्याचा ग्रामस्थांचा समज झाला आणि बुधवारी रात्री तीनच्या सुमारास ग्रामस्थांनी तीन जणांना बेदम मारहाण केली.
ग्रामस्थांनी केलेल्या मारहाणीत एकाचा मृत्यु झालेला असून दोन जण मात्र गंभीर जखमी झालेले आहेत. गावातील वीस ते पंचवीस जणांच्या विरोधात याप्रकरणी गुन्हा दाखल करण्यात आलेला आहे. अनेकदा अशा स्वरूपाच्या अफवा व्हाट्सअप ग्रुप वरून पसरवल्या जातात आणि त्यानंतर असे प्रकार घडतात. व्हाट्सअपवर आपण प्रसिद्ध करत असलेल्या माहितीची जबाबदारी आपल्यावर असते याचे भान ग्रामस्थांनी ठेवणे गरजेचे आहे.
