मुंबई : दूध उत्पादक शेतकऱ्यांना मोठा धक्का बसला आहे. दुधाच्या दरामध्ये २ रुपयांनी घसरण झाली आहे. सध्या राज्यभरात तापमान वाढले असून त्याचा परिणाम फक्त माणसांवरच नव्हे तर जनावरांवर देखील होताना दिसत आहे. उन्हाच्या तीव्रतेमुळे गाईच्या दूध दरामध्ये घसरण झाली आहे. काही दिवसांपूर्वीच दुधाच्या दरामध्ये दोन रुपयांनी वाढ करण्यात आली होती. परंतु पुन्हा वाढलेले भाव कमी करण्यात आले आहेत.
दर २९ रुपयांवरून २७ रुपयांवर आले
३.५ टक्के फॅट आणि ८.५ एसएनएफ असलेल्या गाईच्या दुधाचा प्रति लिटर दर २९ रुपयांवरून २७ रुपयांपर्यंत खाली आला आहे. ज्यामुळे याचा राज्यातील दूध उत्पादक शेतकऱ्यांना मोठा फटका बसणार आहे.
दुधाच्या उत्पादनात ३० ते ४० लाख लिटरपर्यंत घट
दुध उत्पादकांना दररोज तीन कोटी रुपयांपेक्षा जास्त नुकसान होत असल्याने आणि शासनाने नियुक्त केलेल्या समितीच्या शिफारसीप्रमाणे ३४ रुपये प्रति लिटर दर न मिळाल्याने संकट वाढले आहे. राज्यात दररोज साधारणपणे दोन ते सव्वादोन कोटी लिटर दूध उत्पादन होते. परंतु आता उन्हाळ्यात जानवणारी पाण्याची टंचाई आणि तीव्र उष्णतेमुळे दूध उत्पादनात ३० ते ४० लाख लिटरपर्यंत घट झाली आहे.
दुग्धजन्य पदार्थांना मागणी असतानाही दर कमी
अहमदनगर, नाशिक, पुणे, सातारा, सांगली, कोल्हापूर, सोलापूर, मराठवाडा आणि विदर्भातील उन्हाळ्यात लग्नसमारंभ आणि इतर कार्यक्रमांमुळे दुग्धजन्य पदार्थांना मोठी मागणी असते. मात्र, याच काळात दर कमी केल्याने शेतकरी पुरते त्रस्त झाले आहेत. गेल्या वर्षी याच काळात दुधाला प्रति लिटर ३५ रुपयांच्या आसपास दर होता.
