पालघर- अजित पवार यांच्या नेतृत्वातील राष्ट्रवादी काँग्रेस पक्षाचे राज्यसभा खासदार प्रफुल्ल पटेल यांनी पंतप्रधान नरेंद्र मोदी यांच्या डोक्यावर छत्रपती शिवाजी महाराजांचा जिरेटोप चढवल्यानंतर शिवरायांसह त्यांना मानणाऱ्या कोट्यवधी शिवभक्तांचा अपमान झाल्याच्या भावना सर्वसामान्यांकडून व्यक्त होत आहेत. काँग्रेस प्रदेशाध्यक्ष नाना पटोले शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांनी पटेलांवर सडकून टीका केल्यानंतर अखेर प्रफुल्ल पटेल यांनी नरमाईची भूमिका घेतली आहे. छत्रपती शिवाजी महाराजांचा अपमान होईल, अशी कोणतीही गोष्ट कधी मनातही येऊ शकत नाही. यापुढे काळजी घेऊ, अशी ग्वाही प्रफुल्ल पटेल यांनी एक्स सोशल मीडिया अकाऊण्टवरुन दिली आहे.
प्रफुल्ल पटेल काय म्हणाले?
हिंदवी स्वराज्याचे संस्थापक, युगपुरुष छत्रपती शिवाजी महाराज हे आमचे आराध्य दैवत आणि प्रेरणास्थान आहेत. त्यांच्या आदर्शांवर व लोककल्याणाच्या मार्गावर मार्गक्रमण करण्यासाठी आम्ही कटिबद्ध आहोत. छत्रपती शिवाजी महाराज यांचा अपमान होईल, अशी कोणतीही गोष्ट कधी मनातही येऊ शकत नाही. यापुढे काळजी घेऊ.
