जागतिक आरोग्य संघटनेने उच्च रक्तदाबाच्या संदर्भात एक अहवाल प्रसिद्ध केला असून, भारताबाबत अनेक धक्कादायक तथ्य या अहवालात नमूद करण्यात आले आहेत. उच्च रक्तदाब असलेल्या निम्म्या लोकांनी जर आतापासून या आजारावर नियंत्रण मिळवण्याचे प्रयत्न केले तर २०४० पर्यंत भारताला किमान ४६ लाख मृत्यू टाळता येऊ शकतात, असे या अहवालात सांगितले गेले आहे. या अहवालानुसार भारतातील १८.८३ कोटी लोकं सध्या उच्च रक्तदाबाने ग्रस्त आहेत. मात्र, त्यातील फक्त ३७ टक्के लोकांनाच आजाराची कल्पना आहे. जगभरातील ३३ टक्के लोकसंख्या उच्च रक्तदाबाच्या विळख्यात अडकली आहे. त्यापैकी फक्त निम्म्या लोकांना उपचार मिळत असल्याचेही या अहवालात नमूद करण्यात आले आहे.