बीड- भाजप नेत्या पंकजा मुंडे यांना कोरोनाची लागण झाली आहे. त्यांच्यावर घरीच उपचार सुरु असल्याची माहिती समोर आली आहे. नुकतंच पंकजा मुंडे यांनी ट्वीट करत याबाबतची माहिती दिली आहे. दरम्यान काही दिवसांपूर्वी पंकजा मुंडे यांच्या भगिनी आणि बीडच्या भाजप खासदार प्रीतम मुंडे यांनाही कोरोनासदृश लक्षण दिसत होती. त्यामुळे त्या घरीच विलगीकरणात उपचार घेत होत्या. त्यानंतर आता पंकजा मुंडे यांनाही कोरोनाची लागण झाली आहे.दरम्यान ताई काळजी घ्या,आराम करा,मोठा भाऊ म्हणून या प्रसंगात मी कायम सोबत आहे अस म्हणत मंत्री धनंजय मुंडे यांनी धीर दिला आहे .
मी गेल्या काही दिवसांपासून कोरोनामुळे मृत्यू झालेल्या बऱ्याच कुटुंबियांच्या भेटीगाठी घेतल्या होत्या. त्याच वेळी कदाचित मला कोरोनाचा प्रादुर्भाव झाला असेल. त्यामुळे या काळात जे कोणी माझ्या संपर्कात आले आहेत. त्यांनी स्वत:ची कोरोना चाचणी करुन घ्यावी. तसेच काळजी घ्या, असे ट्वीट पंकजा मुंडे यांनी केले आहे.
पंकजा मुंडे पॉझिटिव्ह झाल्याची माहिती मिळाल्यानंतर राज्याचे सामाजिक न्यायमंत्री तथा बीडचे पालकमंत्री धनंजय मुंडे यांनी पंकजा मुंडे यांना धीर दिला आहे .कोरोनाच्या संकटावर मात करून आपण निश्चितच बाहेर पडाल, काळजी घ्या,काळजी करू नका,आराम करा असा सल्ला धनंजय मुंडे यांनी दिला आहे .
