अंबाजोगाई - प्रशासकीय कामकाज लोकाभिमुख करण्यासाठी आणि नागरिकांचा वेळ वाचवण्यासाठी राज्य शासनाच्या महसूल विभागाने २२ सप्टेंबर २०२६ रोजी बीड तालुक्यातील नेकनूर येथे अपर तहसील कार्यालय कार्यान्वित करण्यास अधिकृत मान्यता दिली आहे. केज विधानसभा मतदारसंघाच्या प्रतिनिधी नमिता मुंदडा यांनी शासनाकडे या कार्यालयासाठी सातत्याने केलेला पाठपुरावा अखेर यशस्वी ठरला असून, या निर्णयामुळे परिसरातील हजारो नागरिकांना मोठा दिलासा मिळाला आहे.
कामकाजाचे विभाजन आणि प्रशासकीय अधिकार
वाढती लोकसंख्या आणि भौगोलिक अंतर लक्षात घेऊन प्रशासनाने बीड तहसील कार्यालयांतर्गत असलेल्या महसूल मंडळांची पुनर्रचना केली आहे. आता नव्याने स्थापन होणाऱ्या नेकनूर अपर तहसील कार्यालयाला नेकनूर, येळंबघाट, मांजरसुंभा, चौसाळा आणि लिंबागणेश या पाच महसूल मंडळांचे कामकाज जोडण्यात आले आहे. महाराष्ट्र जमीन महसूल संहिता १९६६ अंतर्गत असलेले सर्व अधिकार या कार्यालयाला मिळतील. परंतु, निवडणूक तसेच संजय गांधी निराधार योजनेसारखी कामे मूळ बीड तहसील कार्यालयाकडूनच हाताळली जातील. चुकून असे अर्ज नेकनूर कार्यालयात आल्यास ते केवळ स्वीकारून मूळ कार्यालयाकडे पुढील कार्यवाहीसाठी पाठवले जाणार आहेत.
तातडीने कामकाज सुरू करण्याचे शासनाचे निर्देश
शासनाने हे कार्यालय तातडीने सुरू करण्यासाठी प्रशासनाला वेगवान हालचाली करण्याचे निर्देश दिले आहेत. सध्या तात्पुरत्या स्वरूपात हे कार्यालय सुरू करण्यासाठी जागा निश्चित केली जाणार आहे. त्यानंतर कायमस्वरूपी जागा शोधून नवीन इमारतीच्या बांधकामाचा प्रस्ताव पंधरा दिवसांत शासनाला सादर करण्याचे आदेश देण्यात आले आहेत. जिल्हाधिकाऱ्यांनी उपलब्ध अधिकारी आणि कर्मचाऱ्यांमधून या कार्यालयासाठी तातडीने मनुष्यबळ उपलब्ध करून द्यायचे आहे. संबंधित उपविभागीय अधिकारी हे या कार्यालयाचे प्रतिवेदन अधिकारी तर बीडचे जिल्हाधिकारी हे नियंत्रक अधिकारी म्हणून काम पाहणार आहेत. या लोकहिताच्या निर्णयाबद्दल मुख्यमंत्री देवेंद्र फडणवीस, उपमुख्यमंत्री सुनेत्रा पवार, उपमुख्यमंत्री एकनाथ शिंदे, महसूलमंत्री चंद्रशेखर बावनकुळे, मंत्री पंकजा मुंडे यांचे आमदार नमिता मुंदडा यांनी आभार मानले आहेत.
