बीड दि.५ (प्रतिनिधी)-  दुध विक्री करून मोटारसायकलवरून गावाकडे परत जात असताना भरधाव टँकरने शेतकऱ्याला चिरडल्याची दुर्दैवी घटना आज (दि.५) रोजी सकाळी आठच्या सुमारास पाटोदा-मांजरसुंबा रोडवरील ससेवाडी फाट्याजवळ घडली. या दुर्दैवी घटनेत शेतकऱ्याचा जागीच मृत्यु झाला असून त्यानंतर उपस्थित संतप्त शेतकऱ्यांनी टँकरच्या काचा फोडल्या. त्यानंतर चालकाला पकडून पोलिसांच्या स्वाधीन केले. बीड तालुक्यातील ससेवाडी येथील रामभाऊ भानुदास सावंत (वय ४८) हे आज सकाळी मोटारसायकल क्रमांक एम.एच.२३, एम.६०६६ वरून दुध विक्री करून गावाकडे जात होते. त्याचवेळी समोरून येणारा टैंकर क्र. एम. एच.१४. एल.बी.८७४४ ने सावंत यांच्या मोटारसायकलला जोराची धडक दिली. यामध्ये मोटारसायकल समोरच्या टाबरखाली येवून रामभाऊ सावंत यांचा जागीच मृत्यू झाला. या घटनेनंतर तेथील शेतकऱ्यांनी टँकरवर दगडफेक करून समोरच्या काचा फोडल्या. त्याचवेळी टैंकर चालकाला ताब्यात घेवून नेकनूर पोलिसांच्या स्वाधीन केले. या दुर्दैवी घटनेने सर्वत्र हळहळ व्यक्त होत आहे.