रिलायन्स इंडस्ट्रीज लिमिटेडने मुकेश अंबानी यांना 2029 पर्यंत कंपनीचे अध्यक्ष आणि एमडी म्हणून ठेवण्यासाठी भागधारकांकडून मंजुरी मागितली आहे. कंपनीला त्यांचा कार्यकाळ पाच वर्षांसाठी वाढवायचा आहे. अंबानी आता 66 वर्षांचे आहेत आणि कंपनीच्या मुख्य कार्यकारी अधिकार्‍यांसाठी कंपनीच्या कायद्याने विहित केलेले वय 70 वर्षे ओलांडतील.वयाच्या 70 वर्षांनंतरही अध्यक्ष आणि व्यवस्थापकीय पदावर राहण्यासाठी त्यांना भागधारकांच्या विशेष ठरावाची आवश्यकता असेल. मुकेश अंबानी यांना पुढील 5 वर्षांसाठी चेअरमन आणि एमडी बनवल्यास ते या कालावधीत कोणतेही वेतन घेणार नाहीत. गेल्या तीन वर्षांत म्हणजे 2020-21, 2021-22 आणि 2022-23 मध्येही त्यांनी कंपनीकडून कोणताही पगार घेतला नाही.

संचालक मंडळाकडून मान्यता
मुकेश अंबानी हे 1977 पासून रिलायन्सच्या संचालक मंडळावर आहेत आणि त्यांचे वडील धीरूभाई अंबानी यांच्या निधनानंतर जुलै 2002 मध्ये त्यांना कंपनीचे अध्यक्ष बनवण्यात आले. शेअरहोल्डर्सना पोस्ट केलेल्या ऑफरमध्ये, रिलायन्सने सांगितले की, त्यांच्या संचालक मंडळाने 21 जुलै 2023 रोजी मुकेश अंबानी यांची सध्याची मुदत संपल्यानंतर 5 वर्षांच्या कालावधीसाठी व्यवस्थापकीय संचालक म्हणून पुनर्नियुक्तीला मान्यता दिली आहे. मुकेश अंबानी यांचा कार्यकाळ पुढील वर्षी 19 एप्रिल 2024 रोजी संपणार आहे.

रिलायन्स भारताची सर्वात मौल्यवान खासगी कंपनी
अब्जाधीश मुकेश अंबानी यांची कंपनी रिलायन्स इंडस्ट्रीज ही भारतातील खासगी क्षेत्रातील सर्वात मौल्यवान कंपनी आहे. रिलायन्स '2022 बरगंडी प्रायव्हेट हुरुन इंडिया 500' यादीत 16.3 लाख कोटी रुपयांसह पहिल्या क्रमांकावर आहे. टाटा कन्सल्टन्सी सर्व्हिसेस (TCS) 11.8 लाख कोटी रुपयांसह दुसऱ्या क्रमांकावर आहे. दुसरीकडे, एचडीएफसी बँक 9.4 लाख कोटी रुपयांसह यादीत तिसऱ्या क्रमांकावर आहे.

जगातील 9वे सर्वात श्रीमंत उद्योगपती
फोर्ब्स अब्जाधीशांच्या अहवालानुसार, मुकेश अंबानी सध्या जगातील 9व्या क्रमांकाचे श्रीमंत उद्योगपती आहेत. त्यांची एकूण संपत्ती 6.9 लाख कोटी रुपये ($83.4 अब्ज) आहे. या यादीत बर्नार्ड अर्नॉल्ट अव्वल आहे. त्यांची एकूण संपत्ती रु. 17.4 लाख कोटी ($211 अब्ज) आहे.