मयतात चालकासह दोन शेतकर्‍यांचा समावेश; रात्री तुळजापुरच्याघाटात घडला अपघात
नेकनूर ; कांदा घेून निघालेल्या टेम्पोचे टायर फुटल्याने टेम्पो डिवायडरवर जोरात धडकला. या अपघातात चालकासह दोन शेतकरी ठार झाले तर एक जण गंभीररित्या जखमी झाला आहे. ही घटना रात्री दोन वाजता तुळजापूरच्या घाटात घडली. या दुर्दैवी घटनेने नेकनूरसह निवडूंगवाडीवर शोककळा पसरली आहे.
नेकनूरपासून काही अंतरावर असलेल्या निवडूंगवाडी, आणि नेकनूर येथील गवळवाडी येथील तीन शेतकर्‍यांनी आपला कांदा एकत्रित करून तो सोलापूरच्या बाजाराला टेम्पो (क्र. एम.एच. १६ ए.ई. ७७०४) यामध्ये घेऊन जात होते. रात्री दोन वाजण्याच्या सुमारास टेम्पोचे टायर फुटल्याने टेम्पो तुळजापूरच्या घाटात डिवायडरवर जोरात धडकला. यात चालक शेख सज्जाद सकलेन (वय ४०, रा. नेकनूर) देवराव धोंडीराम शिंदे (वय ५५ रा. गवळवाडी नेकनूर), मोहन भगवान मुंडे (वय ४५, रा. निवडूंगवाडी)हे तिघे ठार झाले तर भागवत शिवाजी मुंडे (वय ४०, रा. निवडूंगवाडी) हे गंभीररित्या जखमी झाल्याने त्यांना उस्मानाबाद येथील रुग्णालयात दाखल करण्यात आले आहे. या घटनेची माहिती नेकनूर आणि निवडूंगवाडी येथील नागरिकांना झाल्यानंतर अनेकांनी घटनास्थळी धाव घेतली होती.
या दुर्दैवी घटनेने नेकनूर, निवडूंगवाडी, गवळवाडी येथे शोककळा पसरली आहे. दरम्यान मयत चालक नेकनूर येथील असून आपल्या मनमिळावू स्वभावाने ते सर्वत्र परिचीत होते. त्यांच्या अपघाती निधनामुळे नेकनूर येथील व्यापार्‍यांनी बंद ठेवून दुख व्यक्त केले.
