वडवणी दि.६ (प्रतिनिधी) : (Wadwani) शहरातील चिंचवण रोडवरील पतंगे ट्रेडर्स या तीन मजली दुकानाला आज गुरुवार (दि.६)रोजी सकाळी सहाच्या सुमारास भीषण(Fire) आग लागली. दुकानामधील फर्निचर, प्लायवूड, कलर आणि अन्य बांधकाम साहित्याचा मोठा साठा आगीत जळून लाखोंचे नुकसान झाल्याची माहिती आहे.

सकाळी आग लागल्याची माहिती मिळताच दुकान मालक विशाल पतंगे (Beed)आणि नागरिकांनी चिंचवण रोडवरील दुकानाकडे धाव घेतली. मात्र, शहरात केवळ अग्निशमन गाडी असून प्रशिक्षित कर्मचारीच नसल्याने आगीत दुकानाची राख होताना नागरिक आणि दुकान मालक हतबलतेने पाहत होते.  
दुकानामध्ये खालच्या मजल्यावर फर्निचर तर वरच्या मजल्यावर सनमाईक, प्लायवूड, कलर यासह (Wadwani) अन्य बांधकाम साहित्य आहे. हे साहित्य ज्वलनशील असल्याने आगीने काही वेळातच भीषण रूप धारण केले. त्यात अग्निशमन यंत्रणा तोकडी पडल्याने संपूर्ण दुकानास आगीने कवेत घेतले. दरम्यान, तेलगाव, माजलगाव आणि बीड (Beed)येथील अग्निशमन दलास पाचारण करण्यात आले आहे.