बीड - मध्यरात्रीच्या सुमारास येळंबघाट शिवारातील एका पेट्रोल पंपावर दुचाकीवरून आलेल्या दोन तरुणांनी वाॅचमनला बेदम मारहाण केली आणि त्याच्या जवळील रोख तीन हजार रुपये घेऊन पसार झाले. ही घटना शनिवारी रात्री १ वा. घडली. याप्रकरणी गुन्हा दाखल होताच नेकनूर पोलिसांनी तातडीने कारवाही करत दोन्ही तरुणांना ताब्यात घेतले आहे.
नेकनूर पोलीस ठाण्याच्या हद्दीत येळंब घाट शिवारात अरविंद रघुनाथ जाधव यांच्या मालकीचा पेट्रोल पंप आहे. शनिवारी रात्री पेट्रोल पंप बंद झाल्यावर अजय गुलाबराव ढोले आणि शुभम सुभाष काकडे (दोघेही रा. बीड) हे दोघे तरुण दुचाकीवरून तिथे आले. पंपावर पहारा देत असलेले वाॅचमन भिकाजी माधवराव इंगोले यांनी पंप बंद झाल्याचे सांगितल्यावर त्यांनी कॅश, पोरं आणि तुझा मोबाईल कुठे आहेत म्हणून विचारले. मोबाईल नाही असे इंगोले यांनी सांगताच त्या दोघांनी त्यांना बेदम मारहाण केली आणि खिशातील तीन हहार रुपये काढून घेत शिवीगाळ करत पळून गेले. इंगोले यांनी इतर सहकाऱ्यांच्या मदतीने त्यांचा पाठलाग केला, परंतु ते सापडले नाहीत. सीसीटीव्ही फुटेज पाहिल्यानंतर पंपचालक जाधव यांनी त्या तरुणांना ओळखले. याप्रकरणी भिकाजी इंगोले यांच्या फिर्यादीवरून दोन्ही तरुणांवर नेकनूर पोलीस ठाण्यात गुन्हा नोंदवण्यात आला. दरम्यान, पोलिसांनी तातडीने तपास करत त्या दोघांना बीड रोडवरील एका धाब्यावरून ताब्यात घेतले असल्याची माहिती सूत्रांनी दिली.
