बीड (प्रतिनिधी) - भरधाव ट्रॅव्हल्सने पायी ज्योत घेवुन जाणाऱ्या भाविकांना उडवल्याने एका भाविकाचा जागीच मृत्यू झाल्याची दुर्देवी घटना आज पहाटे ३ वाजण्याच्या सुमारास बीड-गेवराई रोडवरील इटकुर फाटा येथे घडली. या अपघातात अन्य सात ते आठ भाविक जखमी झाले आहेत. अरण येथुन संत सावता महाराज यांच्या पुण्यतिथीनिमित्त ज्योत घेवुन पायी गेवराई तालुक्यातील गायकवाड जळगांव येथे जात असतांना बीड- गेवराई रोडवरील इटकुर फाटा येथे बीडकडुन गेवराईकडे जाणारी ट्रॅव्हल्स क्र. एम.एच.२०.ई.जी.००५५ ने ज्योत घेवुन जाणाऱ्या भाविकांना उडविले. या अपघातात हनुमंत आण्णासाहेब आगरकर (वय ३६) यांचा जागीच मृत्यू झाला तर विशाल आबासाहेब जावळे, विश्वंभर अगरकर, ऋषीकेश परमेश्वर अगरकर, नंदु भाऊसाहेब अगरकर, शैलेश कातखडे, महादेव जावळे, परमेश्वर पांगरे यांच्यासह अन्य काही भाविक जखमी झाले आहेत.