केज दि.१६ (प्रतिनिधी) : गेल्या (Kaij)तीन-चार दिवसांपासून पाणलोट क्षेत्रात कोसळणाऱ्या पावसामुळे धनेगाव येथील मांजरा धरणात वेगाने पाणी येत असून लवकरच धरण पूर्णपणे भरण्याच्या स्थितीत आहे. आज (दि.१६) रोजी सकाळपर्यंत धरणाची पाण्याची पातळी ६४१.५० मीटरवर पोहोचली असून धरण ७९.६३ टक्के भरले आहे.

    मांजरा धरणाची एकूण क्षमता २२४ दशलक्ष घनमीटर आहे. धरणातील जिवंत पाणीसाठा १४०.९७ दशलक्ष घनमीटर झाला असून एकूण पाणीसाठा सध्या १८८.०७ दशलक्ष घनमीटर एवढा झाला आहे. अजूनही वरच्या भागातून पाण्याची मोठी आवक सुरूच असल्याने धरणाचे दरवाजे उघडण्याची शक्यता प्रशासनाने व्यक्त केली आहे.मागील काही दिवसात धरणाच्या पाणलोट क्षेत्रात प्रचंड पाऊस झाला आहे. हवामान विभागाच्या अंदाजानुसार पुढील दोन दिवसात आणखी मुसळधार पाऊस पडण्याची शक्यता असल्याचे सांगण्यात आले आहे.पाण्याची वाढती आवक लक्षात घेता लवकरच धरण पूर्ण क्षमतेने भरण्याची शक्यता आहे. त्यानंतर येणारे अतिरिक्त पाणी धरणाचे दरवाजे उघडून मांजरा नदीपात्रात सोडावे लागणार असल्याने मांजरा नदीकाठच्या गावांमध्ये पूरसदृश्य परिस्थिती निर्माण होऊ शकते. त्यामुळे खबरदारीचा उपाय म्हणून मांजरा नदी काठावरील गावांना, शेतकरी किंवा वस्ती करून राहिलेल्या नागरिकांना सावधानतेचा इशारा देण्यात आला आहे.